អាជ្ញាធរតំបន់ បាននិយាយថា មនុស្សយ៉ាងហោចណាស់៣៣នាក់បានស្លាប់ បន្ទាប់ពីមានភ្លៀងធ្លាក់ខ្លាំង និងទឹកជំនន់ធ្ងន់ធ្ងរ នៅក្នុងទីក្រុង Kinshasa រដ្ឋធានីនៃសាធារណរដ្ឋប្រជាធិបតេយ្យកុងហ្គោ (DRC) ។ អភិបាលក្រុង Kinshasa លោក Daniel Bumba បាននិយាយថា ចំនួនអ្នកស្លាប់នេះនៅបណ្តោះអាសន្ន នៅឡើយ វាអាចនឹងកើនឡើង ខណៈកិច្ចខិតខំប្រឹងប្រែងស្វែងរកនិងជួយសង្គ្រោះនៅតែបន្ត។ លោក Bumba បានប្រាប់ប្រព័ន្ធផ្សព្វផ្សាយក្នុងស្រុកថា «យើងនៅតែអនុវត្តការជម្លៀស ជាពិសេសសម្រាប់ក្រុមងាយរងគ្រោះ ដូចជាស្ត្រីមានផ្ទៃពោះ និងកុមារ»។

ដោយមានការគាំទ្រពីផ្នែកយោធា ការជម្លៀសបន្ទាន់កំពុងដំណើរការនៅក្នុងតំបន់មួយចំនួនដែលរងផលប៉ះពាល់ខ្លាំងបំផុត។ ទឹកជំនន់ ដែលបានវាយប្រហារពេញមួយយប់ បានបំផ្លាញហេដ្ឋារចនាសម្ព័ន្ធជាច្រើនកន្លែងនៅក្នុងទីក្រុង។ ផ្លូវសំខាន់ៗត្រូវបានជន់លិច ដែលបណ្តាលឱ្យមានការដាច់ចរន្តអគ្គិសនី និងទឹកស្អាត នៅទូទាំងស្រុកជាច្រើន។

ក្រសួងដឹកជញ្ជូនបានរាយការណ៍ពីការរំខានយ៉ាងខ្លាំងក្នុងការធ្វើដំណើរទៅដល់អាកាសយានដ្ឋានអន្តរជាតិ N'djili ដែលជំរុញឱ្យមានការដាក់ពង្រាយសេវាកម្មទូកចម្លងបន្ទាន់ដើម្បីជួយអ្នកធ្វើដំណើរដែលជាប់គាំងខ្លួន។

ការព្យាករណ៍ឧតុនិយម ព្យាករថានឹងមានភ្លៀងធ្លាក់ខ្លាំងជាបន្តបន្ទាប់ក្នុងរយៈពេលប៉ុន្មានថ្ងៃខាងមុខ នេះ ដែលបង្កើនការព្រួយបារម្ភពីការបំផ្លិចបំផ្លាញបន្ថែមទៀតនៅក្នុងទីក្រុងមានប្រជាជនចំនួន១៧ លាននាក់មួយនេះ។