ម៉ារ៉ាតុង៖ លោក សែម ផល្លា ប្រធានគណៈកម្មការរៀបចំព្រឹត្តិការណ៍រត់ប្រណាំងអន្ដរជាតិ ពាក់កណ្ដាលម៉ារ៉ាតុងនៅអង្គរវត្តខេត្តសៀមរាបបានបញ្ជាក់ថា ការរៀបចំឆ្នាំនេះនឹងផ្ដោតសំខាន់លើសុវត្ថិភាពអ្នកចូលរួម ទាំងមុនពេលចេញរហូតដល់ចប់ការប្រកួត។ ការគូសបញ្ជាក់នេះបានធ្វើឡើងក្នុងសន្និសីទសារព័ត៌មាន ស្ដីពីការរៀបចំទិវារត់ប្រណាំងអន្ដរជាតិពាក់កណ្ដាលម៉ារ៉ាតុងលើកទី២៦ ក្រោមវត្តមានឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាកាលពីថ្មីៗ ខណៈព្រឹត្តិការណ៍កីឡាទេសចរណ៍ដ៏ធំប្រចាំនេះនឹងត្រូវរៀបចំនាថ្ងៃទី០២ ខែមករា ឆ្នាំ២០២២ ខាងមុខ។
ប្រធានគណៈកម្មការដដែលបន្ដថា ការរៀបចំឆ្នាំនេះនឹងខុសប្លែកពីឆ្នាំមុនៗដ្បិតត្រូវធ្វើក្នុងបរិបទកូវីដ។ ហេតុនេះគណៈកម្មការនឹងសហការជាមួយស្ថាប័នជំនាញ ដោយការប្រកួតនឹងត្រូវផ្ដោតការការពារសុវត្ថិភាពជូនអ្នករត់ ជាពិសេសការអនុវត្តវិធានការបង្ការជំងឺកូវីដ-១៩ ដូចជាការវ៉ាស់កម្ដៅជាដើម បើសិនរកឃើញកម្ដៅអ្នកចូលរួមមិនប្រក្រតីនឹងត្រូវធ្វើតេស្ដរហ័សភ្លាមៗ។ បន្ទាប់ពីឆ្លងកាត់កន្លែងត្រួតពិនិត្យនៅច្រក់ខាងលិចនៃប្រាសាទអង្គរវត្តហើយនោះ ក្រៅពីមានការរៀបចំអាកុលសម្រាប់បាញ់ អ្នកចូលរួមទាំងអស់មិនតម្រូវឲ្យដោះម៉ាស់នោះទេ ពោលគឺរង់ចាំរហូតរត់ចេញពីកន្លែងចេញដំណើរយ៉ាងហោច ១០០ម៉ែត្រទើបអនុញ្ញាតឲ្យដោះម៉ាស់ចេញ។ បន្ទាប់ពីរត់មកដល់ទីព្រ័ត្រ គណៈកម្មការក៏នឹងមានរៀបចំម៉ាស់ថ្មីជូនផងដែរ។ លោក សែម ផល្លា បានបន្ថែមថា មកទល់ពេលនេះមានអ្នកចុះឈ្មោះចូលរួមជាង ២,០០០នាក់ហើយ តែដោយសារគណៈកម្មាធិការជាតិអូឡាំពិកកម្ពុជា សម្រេចអនុញ្ញាតឲ្យជនបរទេសចុះឈ្មោះចូលរួមឡើងវិញ គណៈកម្មការក៏សម្រេចពន្យារពេលនៃការចុះឈ្មោះ ១សប្ដាហ៍ទៀត។ ដូច្នេះលោកបានអំពាវនាវឲ្យកីឡាករ-កីឡាការិនីជាតិ និងអន្ដរជាតិចុះឈ្មោះឲ្យបានរួសរាន់ដើម្បីងាយស្រួលក្នុងការរៀបចំសម្ភារៈ។
គួរដឹងថា ទិវារត់ប្រណាំងពាក់កណ្ដាលម៉ារ៉ាតុងអន្ដរជាតិអង្គរ គឺជាព្រឹត្តិការណ៍កីឡាទេសចរណ៍ប្រចាំឆ្នាំដ៏ធំដែលរៀបចំដោយក្រសួងទេសចរណ៍ និង NOCC សហការជាមួយអាជ្ញាធរខេត្តសៀមរាប ដោយមានអ្នកចូលរួមជាង ១ម៉ឺននាក់កាលពីឆ្នាំ២០១៩។ ប៉ុន្ដែក្រោយផ្ទុះជំងឺកូវីដ-១៩ ព្រឹត្តិការណ៍នេះក៏សម្រេចលុបចោលការរៀបចំផ្ទាល់កាលពីឆ្នាំ២០២០ ដោយប្ដូរមកជាការរត់ស្ម័គ្រចិត្ត ឬ Virtual Run វិញ។ ឯកឧត្តម វ៉ាត់ ចំរើន បានមានប្រសាសន៍ថា ការរៀបចំឡើងវិញនេះគឺជាសញ្ញាណវិជ្ជមានដ៏ល្អ ដើម្បីរួមចំណែកទាក់ទាញទេសចរណ៍មកកាន់ខេត្តសៀមរាបឡើងវិញ ពិសេសដើម្បីរួមចំណែកស្ដារសេដ្ឋកិច្ច និងចាកចេញពីវិបត្តិកូវីដ ដោយឯកឧត្តមមានសុទិដ្ឋិយមថា បន្ទាប់ពីព្រឹត្តិការណ៍អន្ដរជាតិនេះ នឹងទាក់ទាញភ្ញៀវទេសចរណ៍អន្ដរជាតិមកលេងកម្ពុជាកាន់តែច្រើន ពិសេសខេត្តសៀមរាបដែលជាខេត្តគោលដៅទេសចរណ៍ពិភពលោកតែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
