ស្ថានភាពមនុស្សធម៌នៅតំបន់ហ្កាហ្សាស្ទ្រីប នៅតែបន្តយ៉ាប់យ៉ឺន រយៈពេល១ឆ្នាំកន្លះ ចាប់តាំងពីជម្លោះបច្ចុប្បន្នរវាងអ៊ីស្រាអែល និងក្រុមហាម៉ាសអ៊ីស្លាមនិយម បានចាប់ផ្តើម។ ការប្រយុទ្ធគ្នា បានចាប់ផ្តើមផ្ទុះឡើង បន្ទាប់ពីក្រុមហាម៉ាសបានបាញ់គ្រាប់រ៉ុក្កែតទ្រង់ទ្រាយធំ និងការវាយប្រហារផ្សេងៗទៀតទៅលើប្រទេសអ៊ីស្រាអែលកាលពីខែតុលា ឆ្នាំ២០២៣ បណ្តាលឱ្យមនុស្សប្រហែល១.២០០នាក់ស្លាប់។

ភាគីទាំងពីរ បានព្រមព្រៀងលើបទឈប់បាញ់រយៈពេលប្រាំមួយសប្តាហ៍នៅក្នុងខែមករាឆ្នាំនេះ ប៉ុន្តែការចរចាសម្រាប់ការបន្តបទឈប់បាញ់បានជាប់គាំង។ កិច្ចព្រមព្រៀងបច្ចុប្បន្ននេះ ស្ថិតក្នុងហានិភ័យនៃការដួលរលំបន្ទាប់ពីយោធាអ៊ីស្រាអែល បន្តការវាយលុករបស់ខ្លួននៅក្នុងតំបន់ហ៊ុមព័ទ្ធមួយនេះកាលពីថ្ងៃទី ១៨ ខែមីនា។ អាជ្ញាធរសុខាភិបាលតំបន់ហ្កាហ្សា បាននិយាយកាលពីថ្ងៃអាទិត្យថាមនុស្ស ១.៣៣៥ នាក់បានស្លាប់ចាប់តាំងពីពេលនោះមក។

អាជ្ញាធរក៏បាននិយាយថាចំនួនអ្នកស្លាប់សរុបបានកើនឡើងដល់ ៥០.៦៩៥នាក់ចាប់តាំងពីការប្រយុទ្ធគ្នាបានផ្ទុះឡើងកាលពី១៨ខែកន្លងទៅនេះ។ អង្គការសហប្រជាជាតិព្រមានថា តំបន់ហ្កាហ្សាប្រឈមហានិភ័យជាថ្មីនៃភាពអត់ឃ្លាន និងកង្វះអាហារូបត្ថម្ភ ខណៈការដឹកជញ្ជូនជំនួយសង្គ្រោះត្រូវបានផ្អាក រយៈពេលជាងមួយខែ។

អ៊ីស្រាអែល និងក្រុមហាម៉ាស នៅតែមានជម្លោះជុំវិញបទឈប់បាញ់ដែលត្រូវបន្ថែមពេល។ តាមសេចក្តីរាយការណ៍ ក្រុមហាម៉ាសបានយល់ព្រមចំពោះសំណើរបស់ប្រទេសអេហ្ស៊ីប និងភាគីផ្សេងទៀត ក្នុងការដោះលែងចំណាប់ខ្មាំងជាច្រើននាក់ជាថ្នូរនឹងការបន្តបទឈប់បាញ់សម្រាប់រយៈពេលជាក់លាក់មួយ។ ប៉ុន្តែអ៊ីស្រាអែល ត្រូវបានគេនិយាយថា បានបង្ហាញការប្រឆាំងចំពោះសំណើនេះ ដែលបានទាមទារឱ្យដោះលែងចំណាប់ខ្មាំងបន្ថែមទៀត។