ប្រធានាធិបតីនៃសាធារណរដ្ឋដូមីនីក លោក Luis Abinader បាននិយាយកាលពីថ្ងៃអាទិត្យថា លោកកំពុងដាក់ពង្រាយកងទ័ពបន្ថែមទៀត ទៅកាន់ព្រំដែនរបស់ប្រទេសនេះ ជាមួយប្រទេសហៃទី ដែលកំពុងទទួលរងនូវវិបត្តិសន្តិសុខយ៉ាងធ្ងន់ធ្ងរ។

លោក Abinader បានបន្ថែមថា លោកបានយល់ព្រមលើការសាងសង់ផ្នែកថ្មីនៃជញ្ជាំងមួយ រវាងប្រទេសទាំងពីរ ដែលមានកោះធំជាងគេទី២ នៅតំបន់ការ៉ាអ៊ីប បន្ទាប់ពីប្រទេសគុយបា។

លោក Abinader ដែលបានជាប់ឆ្នោតលើកដំបូង ក្នុងឆ្នាំ ២០២០ និងទទួលបានអាណត្តិទី ២ កាលពីឆ្នាំមុន បានធ្វើឲ្យការប្រយុទ្ធប្រឆាំងនឹងជនអន្តោប្រវេសន៍ ក្លាយជាបញ្ហាចម្បងសម្រាប់រដ្ឋបាលរបស់លោក ដោយបានបណ្តេញចេញយ៉ាងច្រើននូវជនជាតិហៃទីដែលគ្មានឯកសារ។

យោងតាមទិន្នន័យផ្លូវការបានឲ្យដឹងថា ជនជាតិហៃទីប្រហែលជ ៨៦.៤០០នាក់ ត្រូវបានបណ្តេញចេញនៅចន្លោះខែមករា ដល់ខែមីនា ឆ្នាំ ២០២៥ បន្ទាប់ពី ២៧៦.០០០ នាក់ ត្រូវបានបណ្តេញចេញ នៅឆ្នាំ ២០២៤។

លោកប្រធានាធិបតី បាននិយាយនៅក្នុងសន្ទរកថាស្តីពីជនអន្តោប្រវេសន៍ថា៖«យើងនឹងបង្កើនការឃ្លាំមើលព្រំដែន ជាមួយនឹងការបន្ថែមកងទ័ពចំនួន ១.៥០០នាក់ ទៅលើទាហាន ៩.៥០០នាក់ ដែលត្រូវបានដាក់ពង្រាយរួចហើយ»។

ព្រំដែនហៃទី-សាធារណៈរដ្ឋដូមីនីក លាតសន្ធឹងជាង ៣០០ គីឡូម៉ែត្រ ពីខាងជើងទៅខាងត្បូងឆ្លងកាត់កោះ Hispaniola។