អភិបាលក្រុងបាងកក លោក Chadchart Sittipunt កាលពីថ្ងៃអាទិត្យ (ទី៦ ខែមេសា) បានទទួលស្គាល់ថា ប្រតិបត្តិការជួយសង្គ្រោះដែលកំពុងបន្តមាន មិនបានរកឃើញសញ្ញាបង្ហាញពីការមានជីវិតទៀតទេ នៅក្រោមគំនរបាក់បែកនៃអគារការិយាល័យសវនកម្មរដ្ឋដែលបានបាក់រលំ នៅសង្កាត់ Chatuchak ក្នុងទីក្រុងបាងកក ប្រទេសថៃ។

គួរបញ្ជាក់ថា ការបាក់រលំនេះ បានកើតឡើងកាលពីថ្ងៃទី២៨ ខែមីនា បន្ទាប់ពីមានការរញ្ជួយដីកម្រិត ៧,៧រិចទ័រដែលបានវាយប្រហារសហភាពមីយ៉ាន់ម៉ា។ លោក Chadchart បានផ្តល់បច្ចុប្បន្នភាព កាលពីព្រឹកថ្ងៃទី៦ ខែមេសា ដោយនិយាយទៅកាន់សារព័ត៌មាននានា នៅកន្លែងបាក់រលំនោះ។

លោកបានប្រាប់ថា៖ «ខ្ញុំត្រូវតែទទួលស្គាល់ថា រហូតមកដល់ពេលនេះ គ្មានសញ្ញាបង្ហាញពីការនៅមានជីវិត ត្រូវបានរកឃើញទៀតទេ។ គ្មានការស្រែកហៅឲ្យជួយទៀតឡើយ»។

ជាមួយគ្នានេះ លោក Chadchart បាននិយាយថា ចំនួនអ្នកស្លាប់ជាផ្លូវការ នឹងត្រូវបានប្រកាសដោយនគរបាល ដើម្បីចៀសវាងការភ័ន្តច្រឡំ។ ហើយលោកបានបញ្ជាក់បន្ថែមថា៖ «និយាយដោយស្មោះត្រង់ ឱកាសនៃការស្វែងរកអ្នកនៅរស់រានមានជីវិត បានបាត់បង់ហើយ ហើយសពបន្ថែម ទំនងជានឹងត្រូវបានរកឃើញ»។

លោក Chadchart បានកត់សម្គាល់ថា ប្រតិបត្តិការជួយសង្គ្រោះ បានឈានចូលដល់ថ្ងៃទី១០ ហើយ ដោយក្រុមជួយសង្គ្រោះឥឡូវនេះត្រូវពឹងផ្អែកលើគ្រឿងចក្រធុនធ្ងន់បន្ថែមទៀត ដើម្បីយកបន្ទះបេតុងធំៗចេញ៕