កាយសម្ព័ន្ធ៖ លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា បានចាត់ទុកវគ្គបណ្ដុះបណ្ដាលគ្រូបង្វឹកគឺជាផ្នែកដ៏សំខាន់នៃដំណើរការអភិវឌ្ឍ ពិសេសការរួមចំណែកផលិតនូវធនធានកីឡាករ-កីឡាការិនីក្នុងដំណើរឆ្ពោះទៅស៊ីហ្គេមឆ្នាំ២០២៣ នៅកម្ពុជា។ ការគូសបញ្ជាក់បែបនេះ បន្ទាប់ពីសហព័ន្ធបានរៀបចំវគ្គបណ្ដុះបណ្ដាលគ្រូបង្វឹកកីឡាកាយសម្ព័ន្ធកម្រិត១ និងការបោះជុំរុំប្រចាំឆ្នាំ២០២១ រយៈពេល ៧សប្ដាហ៍ចាប់ពីថ្ងៃទី០១ ដល់ថ្ងៃទី០៧ ខែធ្នូនេះនៅសាលាបឋមសិក្សាសាលាលេខ៥ ខេត្តកំពង់ឆ្នាំង។
អគ្គលេខាធិការសហព័ន្ធ និងជាគ្រូឧទ្ទេសប្រចាំវគ្គដដែលបន្ដថា វគ្គនេះមានសារៈសំខាន់ណាស់ក្នុងការបញ្ជ្រាបចំណេះដឹងជូនដល់គ្រូបង្វឹក ហើយគ្រូបង្វឹកទាំងថ្នាក់ជាតិ និងថ្នាក់ក្រោមជាតិ នឹងយកចំណេះដឹងនៃក្បួនច្បាប់ថ្មីៗទាំងនេះទៅបង្ហាត់បង្រៀនដល់កីឡាករ-កីឡាការិនីកាន់តែរីកចម្រើន និងដើរទាន់ការអភិវឌ្ឍថ្មីៗរបស់ប្រភេទកីឡាកាយសម្ព័ន្ធអន្តរជាតិ។ អ្នកជំនាញកីឡាកាយសម្ព័ន្ធរូបនេះបានបង្ហាញសុទិដ្ឋិនិយមថា តាមរយៈវគ្គបណ្តុះបណ្តាលកម្រិតខ្ពស់នេះ នឹងជួយជំរុញការអភិវឌ្ឍឲ្យកាន់តែល្អប្រសើរឆ្ពោះទៅទទួលធ្វើម្ចាស់ផ្ទះស៊ីហ្គេមឆ្នាំ២០២៣ ក៏ដូចជាទៅថ្ងៃអនាគត។ ទន្ទឹមជាមួយគ្នាលោកក៏បានថ្លែងអំណរគុណប្រធានសហព័ន្ធ គឺឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ ដែលបានយកចិត្តទុកដាក់ចំពោះការរៀបចំវគ្គនេះ ពិសេសការរៀបចំត្រូវបានអនុវត្តន៍យ៉ាងខ្ជាប់ខ្ជួនតាមវិធានការសុខាភិបាល ដើម្បីទប់ស្កាត់ការរីករាលដាលជំងឺកូវីដ-១៩។
គួរដឹងថា វគ្គនេះមានសិក្ខាកាមចូលរួម ២២នាក់មកពី ៤រាជធានី-ខេត្តក្រោមការឧបត្ថម្ភគាំទ្រពីក្រសួងអប់រំ យុវជន និងកីឡា ហើយវគ្គនេះក៏ជាការភ្ជាប់ជាមួយការត្រៀមរៀបចំ ការប្រកួតកីឡាកាយសម្ព័ន្ធជ្រើសរើសជើងឯកថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន លើកទី៥ នៅខេត្តកំពង់ឆ្នាំងចាប់ពីថ្ងៃទី៨ ដល់ថ្ងៃទី១៣ ខែធ្នូ ឆ្នាំ២០២១ ខាងមុខផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
