ការគាំទ្រ សម្រាប់រដ្ឋាភិបាលនៃគណបក្សការងាររបស់នាយករដ្ឋមន្ត្រី លោក Anthony Albanese បានកើនឡើងដល់កម្រិតខ្ពស់បំផុត ក្នុងរយៈពេល ១១ខែ នៅមុនការបោះឆ្នោត នាថ្ងៃទី៣ ខែឧសភា ដោយវាកើតមានស្របពេលដែលពន្ធគយបដិការរបស់ប្រធានាធិបតីអាមេរិក លោក Donald Trump ដែលបានធ្វើទីផ្សាររងផលប៉ះពាល់ខ្លាំងដោយសារពាណិជ្ជកម្មរបស់ប្រទេសអូស្ត្រាលីធ្លាក់ចូលទៅក្នុងភាពច្របូកច្របល់ ចាប់ផ្តើមកាលពីថ្ងៃទី៤ ខែមេសា។

បើយោងតាមការស្ទង់មតិរបស់ស្ថាប័ន Newspoll ដែលធ្វើតែលើគណបក្សធំៗចំនួន២ និងដែលត្រូវបានចេញផ្សាយដោយសារព័ត៌មានអូស្ត្រាលី កាលពីថ្ងៃអាទិត្យ (ទី៦ ខែមេសា) បានបង្ហាញថា គណបក្សការងារដែលមាននិន្នាការកណ្ដាលនិយមឆ្វេងនិយម បានមើលឃើញការបោះឆ្នោតគាំទ្រខ្លួនកើនឡើងដល់ ៥២ភាគរយ ពោលគឺឡើង ១ភាគរយ ពីកម្រិតសប្តាហ៍មុន ហើយក៏ជាលទ្ធផលដ៏រឹងមាំបំផុត គិតចាប់តាំងពីខែឧសភា ឆ្នាំ២០២៤ មក។ ក្នុងពេលជាមួយគ្នានេះ ការគាំទ្រសម្រាប់គណបក្សសម្ព័ន្ធជាតិសេរីនិយម (Liberal-National Coalition) បានធ្លាក់ចុះ ១ភាគរយ ដោយដល់កម្រិត ៤៨ភាគរយ។

ចំណែកឯកម្រិតពេញចិត្តលោក Albanese បានធ្លាក់ចុះបន្តិច ដោយមកនៅត្រឹម ៤២ភាគរយ ខណៈដែលប្រជាប្រិយភាពរបស់មេដឹកនាំក្រុមសេរីនិយម លោក Peter Dutton បានកើនឡើង ១ភាគរយ ប៉ុន្តែលោកនាយករដ្ឋមន្ត្រី នៅតែមានប្រជាប្រិយភាពជាងគូប្រជែងរបស់លោកដដែល។

លទ្ធផលនៃការស្ទង់មតិនេះកើតមានឡើង ក្នុងពេលដែលសប្តាហ៍ដំបូងនៃយុទ្ធនាការបោះឆ្នោតឆ្នាំ២០២៥ ត្រូវបានគ្របដណ្ដប់ដោយការប្រកាសរបស់លោក Trump អំពីពន្ធបដិការ ដែលឃើញថា អូស្ត្រាលីត្រូវទទួលរងនូវការយកពន្ធ ១០ភាគរយលើការនាំចូលទាំងអស់ទៅកាន់សហរដ្ឋអាមេរិក។

គួរបញ្ជាក់ថា ប្រទេសអូស្ត្រាលីកំពុងឆ្ពោះទៅរកការបោះឆ្នោត នៅខែឧសភា ដោយលោក Albanese ព្យាយាមក្លាយជាមេដឹកនាំអូស្ត្រាលីដំបូងគេ ក្នុងរយៈពេល ២ទសវត្សរ៍ ដែលអាចឈ្នះការបោះឆ្នោតជាប់ៗគ្នា៕