មេដឹកនាំស្តាំនិយមជ្រុលរបស់បារាំង គឺលោកស្រី Marine Le Pen កាលពីថ្ងៃអាទិត្យ (ទី៦ ខែមេសា) បានប្តេជ្ញាបន្តមហិច្ឆិតាប្រជែងតំណែងប្រធានាធិបតីរបស់ខ្លួន បន្ទាប់ពីលោកស្រីត្រូវបានរកឃើញថា មានទោសពីបទកេងបន្លំ និងត្រូវបានហាមប្រាមមិនឲ្យឈរឈ្មោះ សម្រាប់តំណែងនេះ ដោយបាននិយាយនៅឯការជួបជុំមួយថា គណបក្សរបស់លោកស្រី គឺជាគោលដៅនៃ «ក្រុមមនុស្សអាក្រក់»។

បណ្ដាក្រុមគូប្រជែង គឺគណបក្ស National Rally (RN) របស់លោកស្រី Le Pen ក្រុមកណ្តាលនិយម និងក្រុមឆ្វេងនិយម បានជួបជុំគ្នារៀងៗខ្លួន ចំពេលមានភាពតានតឹងថ្មី ដោយការជួបជុំនេះ កើតមានឡើង ៦ថ្ងៃបន្ទាប់ពីតុលាការក្រុងប៉ារីស បានផ្តន្ទាទោសស្ត្រីវ័យ ៥៦ឆ្នាំពីបទបង្វែរមូលនិធិសភាសហភាពអឺរ៉ុប (EU)។

ការស្ទង់មតិ បានបង្ហាញថា ឥស្សរជនរបស់គណបក្ស RN ជាអ្នកនាំមុខគេ នៅមុនការបោះឆ្នោតជ្រើសរើសប្រធានាធិបតី ក្នុងរយៈពេល ២ឆ្នាំខាងមុខ ហើយការកាត់ទោសរបស់តុលាការ បានផ្ដល់ការភ្ញាក់ផ្អើលដល់ការមជ្ឈដ្ឋាននយោបាយរបស់ប្រទេសបារាំង។

លោកស្រី Le Pen បាននិយាយនៅឯកន្លែងជួបជុំមួយ នាកណ្តាលទីក្រុងប៉ារីស ដើម្បីថ្កោលទោសការកាត់ទោសលើលោកស្រី និងមន្រ្តីរបស់គណបក្ស RN ផ្សេងទៀត។ តែក្រុមគូប្រជែងរបស់លោកស្រី បានគាំទ្រការសម្រេចរបស់តុលាការ។ អតីតនាយករដ្ឋមន្ត្រី លោក Gabriel Attal បានប្រាប់អ្នកគាំទ្ររបស់លោកថា «ប្រសិនបើអ្នកលួចបន្លំ អ្នកនឹងត្រូវទទួលផល»។

គួរបញ្ជាក់ថា លោកស្រី Le Pen វ័យ ៥៦ឆ្នាំត្រូវបានកាត់ទោសឲ្យជាប់ពន្ធនាគាររយៈពេល ៤ឆ្នាំ ដោយមានរយៈពេលព្យួរទោស ២ឆ្នាំ និងត្រូវបានហាមឃាត់មិនឲ្យចូលរួមប្រជែងតួនាទីការិយាល័យសាធារណៈរយៈពេល ៥ឆ្នាំ។ លោក Le Pen បានប្រាប់អ្នកគាំទ្រលោកស្រី នៅទីលានក្រុងប៉ារីសថា «ខ្ញុំនឹងមិនបោះបង់ជាដាច់ខាត»។ លោកស្រីបាននិយាយថា «ក្រុមមនុស្សអាក្រក់» គឺនៅពីក្រោយការផ្តន្ទាទោសនេះ៕