ប្រធានាធិបតីទុយនីស៊ី លោក Kais Saied កាលពីថ្ងៃអាទិត្យ បានបដិសេធយ៉ាងម៉ឺងម៉ាត់ថា ទុយនីស៊ី មិនបានចុះកិច្ចព្រមព្រៀងណាមួយ ជាមួយបណ្តាប្រទេសអឺរ៉ុប សម្រាប់ការនិរទេសជនជាតិទុយនីស៊ី ដែលរស់នៅខុសច្បាប់ក្នុងទ្វីបអឺរ៉ុប ក្នុងអំឡុងពេលកាន់តំណែងជាប្រធានាធិបតីរបស់លោក។ នេះបើយោងតាមស្ថានីយវិទ្យុឯកជន Mosaique FM។

ថ្លែងនៅក្នុងពិធីមួយនៅខេត្តឆ្នេរសមុទ្រ Monastir ភាគខាងកើត ដើម្បីប្រារព្ធខួបលើកទី ២៥ នៃការស្លាប់របស់អតីតប្រធានាធិបតី Habib Bourguiba លោក Saied បានសង្កត់ធ្ងន់ថា កិច្ចព្រមព្រៀងបែបនេះតែមួយគត់ ត្រូវបានចុះហត្ថលេខា មុនពេលលោកចូលកាន់តែតំណែងប្រធានាធិបតី។

ដោយបានលើកឡើងពីការរុះរើជំរំជនអន្តោប្រវេសន៍ នៅអនុតំបន់សាហារ៉ាអាហ្វ្រិក នាពេលថ្មីៗនេះ នៅក្នុងខេត្ត Sfax ភាគអាគ្នេយ៍ លោក Saied បាននិយាយថា សកម្មភាពរបស់ទុយនីស៊ី ត្រូវបានដឹកនាំដោយគោលការណ៍មនុស្សធម៌ និងសីលធម៌។

លោក Saied បានបង្ហាញថា ផែនការដែលសង្ស័យក្នុងការតាំងទីលំនៅថ្មីសម្រាប់ជនអន្តោប្រវេសន៍ ដែលគ្មានឯកសារ នៅក្នុងតំបន់ El Amra និង Jebniana នៃទីក្រុងកំពង់ផែ Sfax ត្រូវបានរារាំង។

លោកប្រធានាធិបតីបានសង្កត់ធ្ងន់ថា ដំណើរការជម្លៀសត្រូវបានធ្វើឡើងដោយសន្តិវិធី ដោយមិនប្រើប្រាស់អាវុធ ឬឧស្ម័នបង្ហូរទឹកភ្នែក ហើយបានអះអាងថា ជនអន្តោប្រវេសន៍ទាំងអស់ ត្រូវបានថែទាំដោយសេចក្តីថ្លៃថ្នូរ និងការគោរព។