​បាល់ទាត់៖ ​ខ្សែប្រយុទ្ធ​ព័រទុយហ្កាល់ Cristiano Ronaldo បាន​ស៊ុត​បញ្ចូល​ទី​គ្រាប់​បាល់​ទី ៨០០ និង ៨០១ របស់ខ្លួន​ឱ្យ Manchester United វាយបក​យកឈ្នះ​កាំភ្លើង​ធំ Arsenal ៣-២ នៅ Old Trafford យប់មិញ​។

​​អ្នកចាត់ការ​ថ្មី​របស់ Man Utd លោក Ralf Rangnick អង្គុយ​ទស្សនា​ពី​ខាងលើ ​ខណៈ Michael Carrick គឺជា​អ្នកដឹកនាំ​ក្រុម​ប្រកួត​ចុងក្រោយ​មុន​ប្រកាស​ចាក​ចេញពី​ក្លិប​។ ​Emile Smith Rowe ស៊ុត​បើក​ការនាំ​មុខមុន​នៅ​នាទី​ទី១៣ ជា​គ្រាប់​បាល់​ចម្រូងចម្រាស​មួយ​ក្រោយ​អ្នកចាំទី David De Gea ដួល​នៅមុខ​ទី​តែ VAR សំរេច​ឱ្យ​គ្រាប់​បាល់​នេះ​ទៅ Arsenal ព្រោះ De Gea ដួល​ដោយសារ​ប៉ះ​មិត្ត​រួម​​ក្រុម​ខ្លួន​ឯង​។ ​​មុន​ចប់​វគ្គ​ទី១ Bruno Fernandes ក៏​ស៊ុត​តាម​ស្មើ​វិញ​នៅ​នាទី​ទី៤៤ ដើម្បី​អបអរ​ប្រកួត​ទី ១០០ របស់ខ្លួន​នៅ​បិសាច​ក្រហម​។​ ​​ចូល​វគ្គ​ទី២ Cristiano Ronaldo ស៊ុត​នាំមុខ​សាជាថ្មី​នៅ​នាទី​ទី៥២ ដែលជា​គ្រាប់​បាល់​ទី ៨០០ គត់​ឱ្យ​ក្លិប​អាជីព និង​ជំរើសជាតិ​មុនពេល​ដែល Martin Odegaard ស៊ុត​តាម​ស្មើ​ឱ្យ Arsenal វិញ ២នាទី​បន្ទាប់​។

​​ក្រោយមក Manchester United ក៏​ទទួលបាន​បាល់​ពិន័យ ១១ម៉ែត្រ​ក្រោយ Odegaard ធ្វើឱ្យ Fred ដួល​ក្នុង​ប្រអប់​គ្រោះថ្នាក់ ​ខណៈ Cristiano Ronaldo ស៊ុត​គ្រាប់​ជ័យជំនះ ៣-២ និង​ជា​គ្រាប់​ទី ៨០១​។ ​​ជ័យជំនះ​នេះ​ធ្វើឱ្យ Manchester United ឡើងមក​លេខ ៧ មាន ២១ពិន្ទុ​ខណៈ Arsenal បន្ត​ឈរ​លេខ ៥ មាន ២៣ពិន្ទុ​។ ​ប្រកួត​បន្ទាប់ Manchester United ត្រូវ​ទទួល Crystal Palace នៅ​ថ្ងៃអាទិត្យ​នេះ ខណៈ Arsenal ទៅ​ទឹកដី Everton៕

​អត្ថបទ​៖​នាង សុភា​វុ​ធ