ឈរនៅកណ្តាលគំនរបាក់បែកប្រាសាទប្រវត្តិសាស្រ្ត Me Nu Brick ស្ថិតនៅទីក្រុងបុរាណ Inwa អ្នកស្រី Mar Oo គឺជាអ្នកមគ្គុទេសក្នុងស្រុកមួយរូបនិយាយថា ការរញ្ជួយដីកម្រិត ៧,៧រ៉ិចទ័រ ដែលបានវាយប្រហារសហភាពមីយ៉ាន់ម៉ាកាលពីរយៈពេល ១សប្តាហ៍មុន បានធ្វើឲ្យគាត់ និងអ្នកស្រុកជាច្រើនផ្សេងទៀត លែងមានប្រាក់ចំណូល ក្រោយវត្តអារាម និងប្រាសាទបុរាណរាប់សិបកន្លែង ត្រូវបានបំផ្លិចបំផ្លាញ ។

អ្នកស្រី Mar វ័យ ៣៦ឆ្នាំ និយាយថា ពួកយើងខកចិត្តជាខ្លាំង នៅពេលដែលប្រាសាទបុរាណរងការបំផ្លិចបំផ្លាញបែបនេះ ។ វាប្រៀបបាននឹងសមាជិគ្រួសារពួកយើងដាច់ពោះស្លាប់អញ្ចឹងដែរ ។

អ្នកស្រីស្ថិតនៅក្នុងចំណោមអ្នកស្រុកជាច្រើននាក់ទៀតដែលពឹងផ្អែកលើការលក់ផ្កា វត្ថុអនុស្សាវរីយ នាំភ្ញៀវទេសនាប្រាសាទ និងថតរូបឲ្យភ្ញៀវ ដើម្បីចិញ្ចឹមជីវិត ។

រដ្ឋាភិបាលយោធាមីយ៉ាន់ម៉ា បាននិយាយកាលពីថ្ងៃអាទិត្យថា តួលេខអ្នកស្លាប់នៅក្នុងគ្រោះរញ្ជួយដីដ៏មហន្តរាយ បានកើនឡើងដល់ ៣.៥៦៤នាក់ និងមនុស្ស ៥.០១២នាក់ផ្សេងទៀតបានរងរបួស ក្នុងនោះមនុស្ស ២១០នាក់ផ្សេងទៀត កំពុងបាត់ខ្លួន។ 

កាលពីល្ងាចថ្ងៃអាទិត្យ ប្រជាជនក្នុងតំបន់រងគ្រោះដោយការរញ្ជួយដីនៅមីយ៉ាន់ម៉ា បានរងផលប៉ះពាល់ដោយសារអាកាសធាតុមិនល្អ បន្ទាប់ពីភ្លៀងធ្លាក់ខ្លាំង និងខ្យល់បក់បោកកាលពីយប់ថ្ងៃសៅរ៍ បានរំខានដល់ប្រតិបត្តិការជួយសង្គ្រោះ និងសម្រាលបន្ទុក ហើយបានបន្ថែមទុក្ខវេទនាដល់មនុស្សជាច្រើន ដែលបាត់បង់ផ្ទះសម្បែងរបស់ពួកគេ ក្នុងគ្រោះមហន្តរាយធម្មជាតិមួយនេះ ហើយត្រូវបង្ខំចិត្តសម្រាកនៅកណ្តាលវាល ៕