ភ្លៀងធ្លាក់ខ្លាំង បណ្តាលឲ្យជន់លិចទីក្រុងជាច្រើននៅទូទាំងរដ្ឋ Ohio សហរដ្ឋអាមេរិកកាលពីចុងសប្តាហ៍កន្លងទៅ ក្នុងនោះក្រុមជួយសង្រ្គោះ និងក្រុមការងារ ព្យាយាមសង្រ្គោះមនុស្សកាលពីថ្ងៃអាទិត្យ ។

 កាលពីថ្ងៃសៅរ៍កន្លងទៅ ព្យុះកួចដ៏កាចសាហាវ ភ្លៀងធ្លាក់ខ្លាំង និងទឹកជំនន់ បានកើតឡើង នៅភាគខាងត្បូង និងភាគខាងលិចសហរដ្ឋអាមេរិក ដោយសម្លាប់មនុស្សយ៉ាងហោចណាស់ ១៦នាក់ បង្កការជន់លិច និងការខូចខាតជាច្រើន ខណៈអ្នកព្យាករអាកាសធាតុ ព្រមានថា ទឹកទន្លេនៅកន្លែងមួយចំនួននឹងបន្តហក់ឡើងខ្ពស់រយៈពេលជាច្រើនថ្ងៃទៀត ។

 រូបភាពវីដេអូឃ្លីបពីទីក្រុង Cincinnati, Dayton, Montgomery និងទីក្រុង Franklin ស្ថិតក្នុងរដ្ឋ Ohio ឃើញពីទំហំនៃការខូចខាតដែលរដ្ឋាភិបាលរដ្ឋ បានព្រមានដល់ប្រជាពលរដ្ឋ ។

 អភិបាលរដ្ឋ Ohioលោក Mike DeWine បានស្នើសុំឲ្យអ្នកស្រុកត្រៀមខ្លួនសម្រាប់ការធ្លាក់ភ្លៀង និងទឹកជំនន់ដ៏គំហក់ ជាពិសេសនៅតំបន់ភាគខាងត្បូងរដ្ឋ ។

ភ្លៀងធ្លាក់ខ្លាំងបានវាយប្រហារតំបន់ភាគកណ្តាលអាមេរិក ធ្វើឲ្យផ្លូវថ្នល់រងការជន់លិច និងបង្កឲ្យមានគ្រោះទឹកជំនន់យ៉ាងគំហុក ចាប់ពីរដ្ឋ Texas ដល់រដ្ឋ Ohio ។ 

សេវាកម្មឧតុនិយមជាតិនិយាយថា ទីតាំងរាប់សិបកន្លែងនៅក្នុងរដ្ឋជាច្រើន ត្រូវរំពឹងថានឹងឈានដល់ដំណាក់កាលទឹកជំនន់ធំ ជាមួយនឹងការជន់លិចយ៉ាងទូលំទូលាយនៃរចនាសម្ព័ន្ធ ផ្លូវថ្នល់ ស្ពាន និងហេដ្ឋារចនាសម្ព័ន្ធសំខាន់ៗផ្សេងទៀត ៕