ឥស្សជនត្រៀមឡើងកាន់តំណែងអធិការបតី គឺលោក Friedrich Merz នៅថ្ងៃចន្ទ (ទី៧ ខែមេសា) នេះ បានអំពាវនាវឲ្យចាត់វិធានការឲ្យបានឆាប់រហ័ស ដើម្បីធានាបាននូវការប្រកួតប្រជែងរបស់ប្រទេសអាល្លឺម៉ង់ ដែលជាការឆ្លើយតបទៅនឹងការធ្លាក់ចុះនៃទីផ្សារភាគហ៊ុន និងសញ្ញាបណ្ណបំណុល បន្ទាប់ពីមានការប្រកាសរបស់ប្រធានាធិបតីសហរដ្ឋអាមេរិកលោក Donald Trump អំពីការដំឡើងពន្ធគយ។

សន្ទស្សន៍ភាគហ៊ុនធំៗ បានធ្លាក់ចុះយ៉ាងខ្លាំង នៅថ្ងៃចន្ទនេះ ខណៈដែលលោក Trump មិនបានបង្ហាញសញ្ញាពីការបញ្ឈប់ផែនការពន្ធនាំចូលរបស់លោក ហើយអ្នកវិនិយោគប៉ាន់ស្មានពីការមានហានិភ័យខ្ពស់នៃឱនភាពសេដ្ឋកិច្ច ដែលអាចមើលឃើញថា ធនាគារសហព័ន្ធនឹងកាត់បន្ថយអត្រាការប្រាក់យ៉ាងឆាប់នៅខែឧសភា។

នៅក្នុងសេចក្តីថ្លែងការណ៍តាមអ៊ីម៉ែលទៅកាន់ទីភ្នាក់ងារសារព័ត៌មាន Reuters លោក Merz បាននិយាយ ថា៖ «ស្ថានភាពនៅលើទីផ្សារភាគហ៊ុនអន្តរជាតិ និងទីផ្សារសញ្ញាបណ្ណបំណុល គឺធ្ងន់ធ្ងរណាស់ ហើយគំរាមកំហែងពីការមានសភាពកាន់តែអាក្រក់ទៅៗ។ ដូច្នេះ វាជាភាពបន្ទាន់ជាងពេលណាៗទាំងអស់សម្រាប់ប្រទេសអាល្លឺម៉ង់ ក្នុងការស្ដារឡើងវិញនូវការប្រកួតប្រជែងអន្តរជាតិរបស់ខ្លួនឲ្យបានលឿនតាមដែលអាចធ្វើទៅបាន»។

គួរបញ្ជាក់ថា រួមជាមួយបណ្តាប្រទេសសហភាពអឺរ៉ុបផ្សេងទៀត អាល្លឺម៉ង់ប្រឈមមុខនឹងការយកពន្ធនាំចូល ២៥ភាគរយលើដែកថែប និងអាលុយមីញ៉ូម និងរថយន្ត ព្រមទាំងពន្ធ «បដិការ» ចំនួន ២០ភាគរយ ចាប់ពីថ្ងៃពុធតទៅ សម្រាប់ទំនិញស្ទើរតែទាំងអស់ផ្សេងទៀត៕