ទីភ្នាក់ងារសង្គ្រោះបន្ទាន់ជាតិ បានឲ្យដឹងថា ខ្មាន់កាំភ្លើង បានសម្លាប់មនុស្សយ៉ាងតិចណាស់ ៥២នាក់ និងបានជម្លៀសជិត ២.០០០នាក់ផ្សេងទៀតចេញពីកន្លែងស្នាក់នៅ ក្នុងរយៈពេលជាច្រើនថ្ងៃនៃការវាយប្រហារ នៅក្នុងរដ្ឋ Plateau ភាគខាងជើងនៃប្រទេសនីហ្សេរីយ៉ា ដែលមានប្រវត្តិប៉ះទង្គិចហិង្សា រវាងកសិករ និងអ្នកចិញ្ចឹមគោ-ក្របី។

មូលហេតុនាំឲ្យមានការវាយប្រហារ ក្នុងភូមិចំនួន ៦ នៅតំបន់ Bokkos របស់រដ្ឋ Plateau កាលពីសប្តាហ៍មុន មិនទាន់ត្រូវបានដឹងភ្លាមៗនៅឡើយទេ ប៉ុន្តែនេះគឺជាការផ្ទុះឡើងូវអំពើហិង្សាដ៏អាក្រក់បំផុតជាលើកដំបូង គិតចាប់តាំងពីខែធ្នូ ឆ្នាំ២០២៣ មក ជាពេលដែលមនុស្សជាង ១០០នាក់ ត្រូវបានសម្លាប់នៅក្នុងតំបន់តែមួយនេះ។

ទីភ្នាក់ងារគ្រប់គ្រងគ្រោះអាសន្នជាតិ (NEMA) បាននិយាយថា ទំហំនៃអំពើហិង្សាកាន់តែប្រាកដឡើង កាលពីចុងសប្តាហ៍ ខណៈដែលមនុស្សចំនួន ៥២នាក់ ត្រូវបានបញ្ជាក់ថា បានបាត់បង់ជីវិត ហើយ ២២នាក់ផ្សេងទៀតត្រូវបានគេបញ្ជូនទៅមន្ទីរពេទ្យ។

នៅក្នុងសេចក្តីថ្លែងការណ៍មួយ កាលពីល្ងាចថ្ងៃអាទិត្យ (ទី៦ ខែមេសា) NEMA បានឲ្យដឹងថា៖ «ខ្មាន់កាំភ្លើង បានធ្វើការវាយប្រហារយ៉ាងសាហាវឃោរឃៅ ដែលបណ្ដាលឲ្យមានអ្នកស្លាប់ជាច្រើននាក់ និងបំផ្លិចបំផ្លាញទ្រព្យសម្បត្តិយ៉ាងច្រើន»។ អមដោយការបន្ថែមថា ស្ថានភាពសន្តិសុខនៅតែមានភាពតានតឹង ទីភ្នាក់ងារនេះបានឲ្យដឹងទៀតថា៖ «មនុស្សជាង ១.៨២០នាក់ ត្រូវបានផ្លាស់ទីលំនៅ។ ជំរុំភៀសខ្លួនបណ្ដោះអាសន្នចំនួន ៣កន្លែង ត្រូវបានបង្កើតឡើង»។

ប្រធានាធិបតី Bola Tinubu បានដឹកនាំភ្នាក់ងារសន្តិសុខតាមប្រមាញ់អ្នកវាយប្រហារ ដោយពួកគេនឹងត្រូវប្រឈមមុខជាមួយ «ការដាក់ទោសយ៉ាងធ្ងន់ធ្ងរ»៕