ខណៈដែលក្រុងវ៉ាស៊ីនតោនទាមទារឲ្យទីក្រុងតេអេរ៉ង់ឈានដល់កិច្ចព្រមព្រៀងជាមួយខ្លួន ឬបើមិនដូច្នោះទេ ត្រូវប្រឈមជាមួយការទម្លាក់គ្រាប់បែក ជុំវិញកម្មវិធីនុយក្លេអ៊ែរបស់ខ្លួននោះ វិមានក្រឹមឡាំង នៅថ្ងៃចន្ទ (ទី៧ ខែមេសា) នេះ បានឲ្យដឹងថា ប្រទេសរុស្ស៊ីបានត្រៀមខ្លួនជួយដោះស្រាយភាពតានតឹង រវាងសហរដ្ឋអាមេរិក និងអ៊ីរ៉ង់ ។

បន្ទាប់ពីការព្រមានអំពីវិធានការយោធាលើប្រទេសអ៊ីរ៉ង់របស់ប្រធានាធិបតីអាមេរិក លោក Donald Trump បានធ្វើឲ្យមានការភ័យព្រួយពាសពេញទាំងតំបន់នោះ ទីក្រុងមូស្គូបានលើកឡើងម្តងហើយម្តងទៀត ក្នុងការចូលទៅជួយសម្រុះសម្រួល រវាងភាគីទាំង២។

អំឡុងសន្និសីទសារព័ត៌មាន អ្នកនាំពាក្យវិមានក្រឹមឡាំង លោក Dmitry Peskov បានប្រាប់ថា៖ «យើងកំពុងពិភាក្សាជាប្រចាំជាមួយដៃគូអ៊ីរ៉ង់របស់យើង ក្នុងនោះរួមទាំងលើប្រធានបទនៃកិច្ចព្រមព្រៀងនុយក្លេអ៊ែរផងដែរ»។ លោកបានបន្ថែមថា៖ «ដំណើរការនេះនឹងបន្តមាន ក្នុងនោះរួមទាំងនៅពេលអនាគតដ៏ខ្លីខាងមុខនេះផងដែរ។ ហើយជាការពិតណាស់ រុស្ស៊ីបានត្រៀមខ្លួនរួចជាស្រេចហើយ ក្នុងការប្រឹងប្រែងធ្វើអ្វីគ្រប់យ៉ាងដែលអាចធ្វើទៅបាន ដើម្បីរួមចំណែកដល់ការដោះស្រាយបញ្ហានេះតាមមធ្យោបាយនយោបាយ និងការទូត»។

គួររំលឹកថា ក្នុងអំឡុងពេលអាណត្តិដំបូងរបស់លោក លោក Trump បានដកសហរដ្ឋអាមេរិកចេញពីកិច្ចព្រមព្រៀងឆ្នាំ២០១៥ រវាងអ៊ីរ៉ង់ និងមហាអំណាចពិភពលោក ដែលបានដាក់កម្រិតយ៉ាងតឹងរ៉ឹងលើសកម្មភាពនុយក្លេអ៊ែរពេញដោយភាពចម្រូងចម្រាសនេះ ជាថ្នូរនឹងការបន្ធូរបន្ថយទណ្ឌកម្មលើទីក្រុងតេអេរ៉ង់។ អ៊ីរ៉ង់ប្រាប់ថា ខ្លួនត្រូវការថាមពលនុយក្លេអ៊ែរ សម្រាប់គោលបំណងសន្តិភាព ហើយបដិសេធថា ខ្លួនមិនកំពុងស្វែងរកផលិតអាវុធនុយក្លេអ៊ែរនោះឡើយ។

អនុរដ្ឋមន្ត្រីការបរទេសរុស្ស៊ី លោក Sergei Ryabkov បាននិយាយកាលពីសប្តាហ៍មុនថា ការអត្ថាធិប្បាយរបស់លោក Trump ពាក់ព័ន្ធនឹងការទម្លាក់គ្រាប់បែកលើប្រទេសអ៊ីរ៉ង់ បានត្រឹមតែ «ធ្វើឲ្យស្ថានការណ៍កាន់តែស្មុគស្មាញប៉ុណ្ណោះ» ហើយបានព្រមានថា ការវាយប្រហារអាចជា «មហន្តរាយ» សម្រាប់តំបន់។ 

ទីក្រុងមូស្គូ បានពង្រឹងទំនាក់ទំនងកាន់តែស៊ីជម្រៅជាមួយទីក្រុងតេអេរ៉ង់ ចាប់តាំងពីដើមដំបូងនៃជម្លោះទ្រង់ទ្រាយធំ នៅអ៊ុយក្រែន ដោយប្រទេសទាំង ២ បានចុះហត្ថលេខាលើសន្ធិសញ្ញាភាពជាដៃគូយុទ្ធសាស្ត្រ កាលពីខែមករា៕