រដ្ឋមន្ត្រីសហភាពអឺរ៉ុប (EU) បានឯកភាពគ្នាយ៉ាងទូលំទូលាយ នៅថ្ងៃចន្ទ (ទី៧ ខែមេសា) នេះ ដែលថា ប្លុកគួរតែផ្តល់អាទិភាពដល់ការចរចា ដើម្បីឲ្យមានការលុបចោលនូវវិធានការដំឡើងពន្ធដែលត្រូវបានដាក់ដោយប្រធានាធិបតី លោក Donald Trump ជាការសងសឹក បើទោះបីជាខ្លួនបានរៀបចំវិធានការតបតតាមគោលដៅដំបូងក៏ដោយ។

គួរបញ្ជាក់ថា ប្លុកដែលមានសមាជិក ២៧ប្រទេស ត្រូវប្រឈមនឹងកម្រិតពន្ធនាំចូល ២៥ភាគរយលើដែកថែប និងអាលុយមីញ៉ូម និងរថយន្ត ព្រមទាំងពន្ធបដិការ ២០ភាគរយ ចាប់ពីថ្ងៃទី៩ ខែមេសាតទៅ សម្រាប់ទំនិញស្ទើរតែទាំងអស់ ក្រោមគោលនយោបាយរបស់លោក Trump ជាវិធានការផ្ដល់ផលប៉ះពាល់ដល់បណ្ដាប្រទេសដែលលោកនិយាយថា ដាក់របាំងពាណិជ្ជកម្មខ្ពស់ ចំពោះការនាំចូលរបស់សហរដ្ឋអាមេរិក។

បណ្ដារដ្ឋមន្ត្រីដែលត្រួតពិនិត្យពាណិជ្ជកម្ម បានជួបប្រជុំគ្នាក្នុងប្រទេសលុចសំបួ នៅថ្ងៃទី៧ ខែមេសា ដើម្បីពិភាក្សាអំពីការឆ្លើយតបរបស់ EU ក៏ដូចជាពិភាក្សាអំពីទំនាក់ទំនងជាមួយប្រទេសចិន។ មន្ត្រីជាច្រើនបាននិយាយថា អាទិភាពរបស់ EU គឺចាប់ផ្តើមការចរចាជាមួយសហរដ្ឋអាមេរិក និងបញ្ចៀសសង្គ្រាមពាណិជ្ជកម្មទាំងស្រុង។

រដ្ឋមន្ត្រីពាណិជ្ជកម្មហូឡង់ លោកស្រី Reinette Klever បានប្រាប់អ្នកសារព័ត៌មានថា៖ «យើងត្រូវតែបន្តភាពស្ងប់ស្ងាត់ និងឆ្លើយតបតាមរបៀបដែលបន្ថយការកើនឡើននូវភាពតានតឹង។ ទីផ្សារភាគហ៊ុន ឥឡូវនេះ បង្ហាញពីអ្វីដែលនឹងកើតឡើង ប្រសិនបើយើងបង្កើនភាពតានតឹងភ្លាមៗ។ ប៉ុន្តែយើងនឹងត្រៀមខ្លួនដើម្បីចាត់វិធានការតបត ប្រសិនបើចាំបាច់ ដើម្បីឲ្យជនជាតិអាមេរិកចូលតុចរចា»៕