ភាពចលាចលនៅលើទីផ្សារហិរញ្ញវត្ថុពិភពលោកនៅតែបន្តសម្រាប់ថ្ងៃទី ៣ កាលពីថ្ងៃចន្ទ ៧ មេសាដោយសារការដំឡើងពន្ធមិនធ្លាប់មានរបស់លោកប្រធានាធិបតីអាមេរិក Donald Trump លើដៃគូពាណិជ្ជកម្មភាគច្រើនរបស់សហរដ្ឋអាមេរិក។

ការបើកទីផ្សារនៅសហរដ្ឋអាមេរិកនៅព្រឹកថ្ងៃចន្ទដើមសប្ដាហ៍នេះ បានមើលឃើញការបន្តនៃនិន្នាការនៃឱនភាពហិរញ្ញវត្ថុពីសប្តាហ៍មុន ហើយបានបញ្ជាក់ថា អារម្មណ៍វិនិយោគិននៅសហរដ្ឋអាមេរិកគឺដូចគ្នាទៅនឹងនៅអាស៊ី និងអឺរ៉ុប ដែលផ្សារភាគហ៊ុននៅតែបន្តធ្លាក់ចុះកាលពីថ្ងៃចន្ទផងដែរ។

ក្រុមវិនិយោគិនកំពុងបង្កើនក្ដីបារម្ភកាន់តែខ្លាំងពីលទ្ធភាពនៃសង្រ្គាមពាណិជ្ជកម្មកាន់តែធំ ដែលទំនងជានឹងបង្កឱ្យមានឱនភាពសេដ្ឋកិច្ចសកល។

ពួកគេនិយាយថា ការដំឡើងពន្ធនឹងអាចជះឥទ្ធិពលយ៉ាងខ្លាំងទៅលើកំណើនសេដ្ឋកិច្ចពិភពលោក ដោយសារតែថ្លៃដើមផលិតកម្មខ្ពស់ជាងមុន ការធ្លាក់ចុះទំនុកចិត្តអាជីវកម្ម ការប្រែប្រួលទីផ្សារ និងការរំខានដល់ខ្សែសង្វាក់ផ្គត់ផ្គង់។

ក្រុមហ៊ុន JP Morganរបស់អាមេរិក បាននិយាយកាលពីសប្តាហ៍មុនថា ខ្លួនជឿថា លទ្ធភាពនៃឱនភាពសេដ្ឋកិច្ចសកលឥឡូវនេះគឺ៦០% បើប្រៀបធៀបទៅនឹង៤០% មុនពេលការដំឡើងពន្ធដ៏ច្រើនរបស់លោក Trump ត្រូវបានប្រកាស។

ធនាគារ ឌុយឆេ ប៊ែង (Deutsche Bank) បានព្រមាននៅក្នុងកំណត់ត្រាស្រាវជ្រាវមួយកាលពីថ្ងៃចន្ទថា ខណៈលោក Trump បន្តគោលនយោបាយកាន់តែខ្លាំងជាងមុន ការដំឡើងពន្ធថ្មីនឹងផលប៉ះពាល់ជាសកលសម្រាប់ឆ្នាំ ២០២៥ និងច្រើនឆ្នាំ ច្រើនទសវត្សរ៍ខាងមុខទៀត ។

អាស៊ីត្រូវ បានរងផលប៉ះពាល់ខ្លាំងជាងអឺរ៉ុបជាមួយនឹងការដំឡើងពន្ធខ្ពស់ជាង៤០% លើប្រទេសសំខាន់ៗមួយចំនួន ដែលជំរុញឱ្យប្រទេសដូចជាវៀតណាម ឥណ្ឌូនេស៊ី និងកោះតៃវ៉ាន់ កាលពីថ្ងៃអាទិត្យដើម្បីស្វែងរកកិច្ចព្រមព្រៀងពាណិជ្ជកម្មថ្មីជាមួយទីក្រុងវ៉ាស៊ីនតោន៕