ប្រទេសចិន នៅថ្ងៃអង្គារ (០៨ មេសា) នេះ បានរិះគន់យ៉ាងខ្លាំងៗលើ "ការគំរាមកំហែង" របស់លោកប្រធានាធិបតីអាមេរិក Donald Trump ក្នុងការដំឡើងពន្ធ ៥០% បន្ថែមទៀតលើទំនិញរបស់ចិន បន្ទាប់ពីលោកបានទាមទារឱ្យក្រុងប៉េកាំង ដកផែនការពន្ធសងសឹករបស់ខ្លួន។

ប្រសិនបើភាគីទាំងសងខាងមិនដកថយទេ ហើយលោក Trump ប្រកាន់ខ្ជាប់នូវផែនការរបស់ខ្លួនមែននោះ ការយកពន្ធថ្មីសរុបអាចកើនឡើងដល់ ១០៤% នៅឆ្នាំនេះលើទំនិញរបស់ចិន ដែលនាំចូលទៅសហរដ្ឋអាមេរិក ដោយដុតបញ្ឆេះបន្ថែមទៅលើសង្រ្គាមពាណិជ្ជកម្ម ដែលបានជំរុញឱ្យមានការខាតបង់ទីផ្សារដ៏ធំបំផុតចាប់តាំងពីជំងឺរាតត្បាតកូវីដ១៩មក។

ក្រសួងពាណិជ្ជកម្មចិន បាននិយាយក្នុងសេចក្តីថ្លែងការណ៍មួយថា "ការគំរាមកំហែងរបស់ភាគីអាមេរិក ក្នុងការបង្កើនពន្ធប្រឆាំងនឹងចិន គឺជាកំហុសជាន់លើកំហុស ដែលបង្ហាញឱ្យឃើញពីធម្មជាតិនៃការចូលចិត្តគំរាមកំហែងរបស់សហរដ្ឋអាមេរិក ហើយបើទីក្រុងវ៉ាស៊ីនតោន ទទូចចង់បន្តផ្លូវនេះ នោះចិន នឹងប្រយុទ្ធដល់ទីបញ្ចប់"។

លោក Trump បានគំរាមថា លោកនឹងដាក់ពន្ធបន្ថែម ៥០% លើការនាំចូលរបស់អាមេរិកពីប្រទេសចិន នៅថ្ងៃពុធ ០៩ មេសា ស្អែកនេះ ប្រសិនបើទីក្រុងប៉េកាំង មិនដកពន្ធ ៣៤% ដែលខ្លួនដាក់លើផលិតផលអាមេរិកកាលពីសប្តាហ៍មុនទេនោះ។ គួរឱ្យដឹងថា ពន្ធរបស់ចិនទាំងនេះ គឺជាការឆ្លើយតបទៅនឹងពន្ធបដិការ ៣៤% ដែលប្រកាសដោយលោក Trump កាលថ្ងៃទី០២ មេសា៕