រដ្ឋាភិបាលកូរ៉េខាងត្បូង បានអនុម័តផ្លូវការយកថ្ងៃទី០៣ ខែមិថុនា ជាកាលបរិច្ឆេទសម្រាប់ការបោះឆ្នោតជ្រើសរើសប្រធានាធិបតីថ្មី បន្ទាប់ពីការដកតំណែងលោក Yoon Suk Yeol កាលពីសប្តាហ៍មុន ជុំវិញការប្រកាសច្បាប់អាជ្ញាសឹករយៈពេលខ្លីរបស់លោក។

គណៈរដ្ឋមន្ត្រីបានយល់ព្រមលើកាលបរិច្ឆេទនោះនៅថ្ងៃអង្គារ (០៨ មេសា) នេះ បន្ទាប់ពីកិច្ចពិភាក្សាជាមួយគណៈកម្មាធិការជាតិរៀបចំការបោះឆ្នោត ដោយសារតែដំណើរការនេះជារឿងចាំបាច់ដើម្បីអនុម័តថ្ងៃឈប់សម្រាកសាធារណៈសម្រាប់ការបោះឆ្នោត។

គួរឱ្យដឹងថា លោក Yoon ត្រូវបានដកតំណែងដោយតុលាការធម្មនុញ្ញ ពីបទរំលោភលើកាតព្វកិច្ចផ្លូវការរបស់ខ្លួនដោយការចេញក្រឹត្យច្បាប់អាជ្ញាសឹកកាលពីថ្ងៃទី០៣ ខែធ្នូ និងការចល័តទ័ពនៅក្នុងការប៉ុនប៉ងដើម្បីបញ្ឈប់ដំណើរការសភា។ ច្បាប់តម្រូវឱ្យមានការបោះឆ្នោតប្រធានាធិបតីថ្មីក្នុងពេល ៦០ថ្ងៃ ប្រសិនបើតំណែងនេះនៅទំនេរ។

មានបេក្ខជនជាច្រើនត្រៀមចូលប្រកួតប្រជែងដណ្ដើមយកតំណែងកំពូលមួយនេះ។ តាមការស្ទង់មតិរបស់ Gallup ដែលចេញផ្សាយកាលពីថ្ងៃទី០៤ ខែមេសា បង្ហាញថា លោក Lee Jae-myung មេដឹកនាំបក្សប្រជាធិបតេយ្យសេរី ទទួលបានការគាំទ្រពីអ្នកឆ្លើយតបចំនួន ៣៤% លោករដ្ឋមន្ត្រីក្រសួងការងារអភិរក្សនិយម Kim Moon-soo បានការគាំទ្រ ៩% ខណៈអតីតមេដឹកនាំបក្សកាន់អំណាច លោក Han Dong-hoon រកបានការគាំទ្រ ៥% ហើយអភិបាលក្រុង Daegu លោក Hong Joon-pyo មានការគាំទ្រ ៤% ចំណែកអភិបាលក្រុងសេអ៊ូល លោក Oh Se-hoon បានសំឡេងគាំទ្រ ២%៕