កីឡាមហាជន៖ មន្ទីរអប់រំ យុវជន និងកីឡានៃខេត្តកណ្ដាល ក្រោមកិច្ចសហការជាមួយការិល័យជំនាញគឺការិយាល័យអប់រំកាយ និងកីឡាបានប្រកាសរៀបចំការប្រកួត កីឡាមហាជនជ្រើសរើសជើងឯកថ្នាក់ខេត្តប្រចាំឆ្នាំ២០២១ រយៈពេល ១សប្ដាហ៍ចាប់ពីថ្ងៃទី០៤ ដល់ថ្ងៃទី១០ ខែធ្នូខាងមុខនៅតាមទីលានប្រភេទកីឡានីមួយៗក្នុងខេត្តផ្ទាល់។
លោក ពៅ វណ្ណា ប្រធានការិយាល័យអប់រំកាយ និងកីឡាបានបញ្ជាក់ថា ដោយទទួលបានគោលការណ៍ពីថ្នាក់ដឹកនាំការប្រកួតនេះនឹងត្រូវរៀបចំតាមគន្លងថ្មីនៃបរិបទកូវីដ-១៩ បន្ទាប់ពីខកខានរៀបចំជាង ១ឆ្នាំដើម្បីបំផុសកម្មភាពកីឡាក្នុងខេត្ត ពិសេសបំផុសចលនាមហាជនលេងកីឡា និងចូលរួមយុទ្ធនាការដំណើរឆ្ពោះទៅស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នៅកម្ពុជា។ ប្រធានការិយាល័យដដែលបន្ដថា ចំពោះការប្រកួតកីឡាមហាជនជើងឯកថ្នាក់ខេត្តឆ្នាំនេះនឹងរៀបចំការប្រកួត ៥ប្រភេទកីឡាក្នុងនោះកីឡាបាល់ទាត់មាន ១៩ក្រុម (បុរស ១៦ក្រុម និងនារី ៣ក្រុម), បាល់ទះ ១៤ក្រុម (បុរស ៨ក្រុម និងនារី ៦ក្រុម), កីឡាអត្តពលកម្ម ៥ក្រុមសរុប ៦០នាក់, កីឡាទាញព្រ័ត្រមាន ១០ក្រុម សរុបមានកីឡាករ-កីឡាការិនី ១០០នាក់។ ការប្រកួតនឹងធ្វើឡើងនៅទីលានក្នុងខេត្ត រួមមានវិទ្យាល័យ ហ៊ុន សែន សេរីភាព និងវិទ្យាល័យ ហ៊ុន សែន តាខ្មៅជាដើម៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
