នាយករដ្ឋមន្ត្រីអ៊ីស្រាអែល លោក Benjamin Netanyahu បានសន្យាកាលពីថ្ងៃចន្ទថា នឹងលុបបំបាត់អតិរេកពាណិជ្ជកម្មរបស់អ៊ីស្រាអែលជាមួយសហរដ្ឋអាមេរិក ជាចំណាត់ការមួយទំនងជាត្រូវបានតាមដានយ៉ាងដិតដល់ដោយមេដឹកនាំពិភពលោក ខណៈគោលនយោបាយដំឡើងពន្ធរបស់ប្រធានាធិបតី Donald Trump ធ្វើឱ្យទីផ្សារពិភពលោកមានភាពច្របូកច្របល់។

លោក Netanyahu បាននិយាយនៅពេលលោកអង្គុយក្បែរ លោក Trump ក្នុងការិយាល័យ Oval Office នៅសេតវិមានថា «យើងមានបំណងធ្វើវាឱ្យបានលឿន»។ «យើងគិតថាវាជារឿងត្រឹមត្រូវដែលត្រូវធ្វើ ហើយយើងក៏នឹងលុបបំបាត់របាំងពាណិជ្ជកម្មផងដែរ»។ លោក Netanyahu គឺជាមេដឹកនាំបរទេសដំបូងគេដែលបានជួបជាមួយ លោក Trump នៅសេតវិមានចាប់តាំងពីប្រធានាធិបតីសហរដ្ឋអាមេរិករូបនេះ បានប្រកាសពីគោលនយោបាយដំឡើងពន្ធកាលពីសប្តាហ៍មុន ដែលបានរារាំងទីផ្សារហិរញ្ញវត្ថុពិភពលោក និងបង្កើនក្តីបារម្ភនៃវិបត្តិសេដ្ឋកិច្ច។

សហរដ្ឋអាមេរិក ដែលជាសម្ព័ន្ធមិត្តជិតស្និទ្ធបំផុតរបស់អ៊ីស្រាអែល និងជាដៃគូពាណិជ្ជកម្មតែមួយគត់ធំបំផុត មានឱនភាពពាណិជ្ជកម្មទំនិញតម្លៃ៧,៤ពាន់លានដុល្លារជាមួយអ៊ីស្រាអែល។

ក្រោមគោលនយោបាយថ្មីរបស់ លោក Trump ទំនិញអ៊ីស្រាអែលប្រឈមការដំឡើងពន្ធរបស់សហរដ្ឋអាមេរិក១៧ ភាគរយ។ នៅពេលត្រូវបានសួរថាតើរដ្ឋបាលរបស់លោក មានគម្រោងកាត់បន្ថយការដំឡើងពន្ធលើទំនិញអ៊ីស្រាអែលឬយ៉ាងណា លោក Trump មិនបានសន្យានោះទេ។

អ៊ីស្រាអែលមានចំណាត់ការរួចហើយ ដើម្បីលុបចោលការដំឡើងពន្ធដែលនៅសេសសល់របស់ខ្លួនលើការនាំចូលរបស់សហរដ្ឋអាមេរិក កាលពីថ្ងៃអង្គារសប្តាហ៍មុន។ ប្រទេសទាំងពីរបានចុះហត្ថលេខាលើកិច្ចព្រមព្រៀងពាណិជ្ជកម្មសេរីកាលពី៤០ឆ្នាំមុន ហើយប្រហែល៩៨% នៃទំនិញពីសហរដ្ឋអាមេរិក បច្ចុប្បន្ននេះ មិនជាប់ពន្ធនោះទេ។