អ្នកស្រុក នៅទីក្រុង Kinshasa រដ្ឋធានីនៃសាធារណរដ្ឋប្រជាធិបតេយ្យកុងហ្គោ បានដើរឆ្លងកាត់ទឹកជំនន់ដើម្បីទៅដល់លំនៅឋានរបស់ពួកគេ បន្ទាប់ពីទឹកជំនន់ដ៏គំហុកបានបណ្តាលឲ្យមនុស្សរាប់សិបនាក់ ស្លាប់ និងបានធ្វើឱ្យមនុស្សជាច្រើននាក់ទៀតត្រូវភៀសខ្លួនចេញ។

អ្នកស្រី Nandu ពលរដ្ឋរងគ្រោះទឹកជំនន់និយាយថា អ្នកស្រីបានចំណាយពេល៧២ម៉ោងជាប់ខ្លួនក្នុងទឹកជំនន់ជាមួយគ្រួសាររបស់អ្នកស្រី ដោយមិនបានទទួលទានអាហារ។ អ្នកស្រីនិយាយថា «យើងបានបាត់បង់អ្វីៗគ្រប់យ៉ាង»។

រដ្ឋមន្ត្រីសុខាភិបាលខេត្តបាននិយាយថា ភ្លៀងធ្លាក់ខ្លាំងកាលពីចុងសប្តាហ៍ បានបំផ្លាញលំនៅឋាន ផ្លូវថ្នល់ និងបានបណ្តាលឲ្យមនុស្សរាប់សិបនាក់ស្លាប់នៅក្នុងរដ្ឋធានី។ ទន្លេ Ndjili ដែលហូរកាត់ផ្នែកមួយនៃទីក្រុងដែលមានប្រជាជនប្រហែល១៧លាននាក់ បានពេញហៀរច្រាំង។

អភិបាលក្រុង Kinshasa បាននិយាយថា ហេដ្ឋារចនាសម្ព័ន្ធទឹកត្រូវបានរងផលប៉ះពាល់ ប៉ុន្តែការផ្គត់ផ្គង់ នឹងត្រូវបានស្តារឡើងវិញក្នុងពេលឆាប់ៗនេះ។

ជាមួយគ្នានេះ ក្រុមឧទ្ទាម M23 គាំទ្រដោយប្រទេសរ៉្វាន់ដា បានបង្កើនការវាយលុកនៅភាគខាងកើតដ៏ច្របូកច្របល់របស់ប្រទេសនេះ ដោយមនុស្សជាង៧.០០០នាក់ត្រូវបានសម្លាប់នៅក្នុងការប្រយុទ្ធគ្នា ក្នុងរយៈពេលពីរខែដំបូងនៃឆ្នាំនេះ។