រដ្ឋបាលរបស់លោក Trump បានលុបចោលទិដ្ឋាការសម្រាប់និស្សិតបរទេសជាង៣០០នាក់នៅទូទាំងសហរដ្ឋអាមេរិក ជាចំណាត់ការមួយដែលត្រូវបានបញ្ជាក់ដោយសាកលវិទ្យាល័យ និងរដ្ឋមន្ត្រីការបរទេសសហរដ្ឋអាមេរិក លោក Marco Rubio ដែលជាផ្នែកមួយនៃកិច្ចខិតខំប្រឹងប្រែងដែលផ្តោតលើនិស្សិតបរទេស។

កាលពីចុងសប្តាហ៍ ការលុបចោលទិដ្ឋាការ ត្រូវបានរាយការណ៍ដោយសាកលវិទ្យាល័យរាប់សិបកន្លែងនៅទូទាំងប្រទេស រួមមានសាកលវិទ្យាល័យល្បីៗដូចជា សាកលវិទ្យាល័យ Columbia, Cornell, Harvard និងសាកលវិទ្យាល័យ Stanford ជាដើម។ និស្សិតដែលរងផលប៉ះពាល់ភាគច្រើនទាំងនេះ ជាអ្នកដែលបានចូលរួមក្នុងការតវ៉ានៅបរិវេណសាកលវិទ្យាល័យដែលគាំទ្រប៉ាឡេស្ទីន។ ប៉ុន្តែ មន្ត្រីសាកលវិទ្យាល័យបាននិយាយថា អ្នកផ្សេងទៀតដែលមិនពាក់ព័ន្ធនឹងការតវ៉ា ក៏ទទួលរងការលុបចោលទិដ្ឋាការផងដែរ ដោយគ្មានការពន្យល់។

នៅឯសាកលវិទ្យាល័យ Tufts និស្សិតថ្នាក់បណ្ឌិតជនជាតិទួរគី នាង Rumeysa Ozturk ត្រូវបានចាប់ខ្លួនដោយភ្នាក់ងារអន្តោប្រវេសន៍មានរបាំងមុខ កាលពីថ្ងៃទី២៥ ខែមីនា ខណៈកំពុងដើរនៅជិតផ្ទះរបស់នាង។

ក្រសួងសន្តិសុខមាតុភូមិ បានបញ្ជាក់ថា នាង Ozturk បានចូលរួមក្នុងសកម្មភាពគាំទ្រក្រុមហាម៉ាស ទោះបីជាពួកគេមិនបានផ្តល់ភស្តុតាងសម្រាប់ការចោទប្រកាន់នេះក៏ដោយ។

ស្ថានទូតទួរគី បាននិយាយថា ខ្លួនកំពុងធ្វើការជាមួយអាជ្ញាធរអាមេរិក ទាក់ទងនឹងការឃុំខ្លួន នាងOzturk។ ស្ថានទូតបានបញ្ជាក់ថា «រាល់កិច្ចខិតខំប្រឹងប្រែង កំពុងត្រូវបានធ្វើឡើងដើម្បីផ្តល់សេវាកុងស៊ុលចាំបាច់ និងការគាំទ្រផ្លូវច្បាប់ដើម្បីការពារសិទ្ធិពលរដ្ឋរបស់ខ្លួន»។