ច្រើនថ្ងៃបន្ទាប់ពីរញ្ជួយដីកម្រិត ៧,៧រ៉ិចទ័រ បានបំផ្លិចបំផ្លាញភាគកណ្តាលសហភាពមីយ៉ាន់ម៉ាមក ពេលនេះ ទីក្រុង Mandalay ដែលជាតំបន់រងគ្រោះខ្លាំងបំផុតមួយ កំពុងបង្ហាញសញ្ញានៃការងើបឡើងវិញបណ្ដើរៗ ជាមួយនឹងការបើកអាជីវកម្មជាថ្មី និងការផ្លាស់ប្ដូរទីលំនៅរបស់អ្នកស្រុកដែលរងផលប៉ះពាល់។

ស្របពេលបន្តប្រតិបត្តិការស្វែងរក និងជួយសង្គ្រោះ អាជីវកម្មកំពុងបើកឡើងវិញបណ្តើរៗ ដោយហាងលក់គ្រឿងទេសមួយចំនួនមើលឃើញអតិថិជនកើនទ្វេដង ចាប់តាំងពីបើកដំណើរការវិញនៅថ្ងៃទី០១ ខែមេសា មក។ ការផ្គត់ផ្គង់សំខាន់ៗ រួមទាំងអាហារ ភេសជ្ជៈ និងរបស់របរប្រើប្រាស់ផ្ទាល់ខ្លួន ភាគច្រើនត្រលប់ទៅកម្រិតមុនការរញ្ជួយដីវិញ ដោយអ្នកស្រុកជ្រើសរើសការទិញតែរបស់ចាំបាច់ប៉ុណ្ណោះ។

អាជីវកម្មផ្សេងទៀតដូចជាកន្លែងលក់ផ្លែឈើ និងហាងកាត់សក់ ក៏កំពុងស្វាគមន៍អតិថិជនត្រឡប់ទៅវិញផងដែរ។ ទោះបីជាមានវឌ្ឍនភាពក្នុងការសង្គ្រោះ និងការបើកអាជីវកម្មឡើងវិញក៏ដោយ ក៏បញ្ហាប្រឈមសំខាន់ៗនៅតែមានសម្រាប់អ្នកស្រុកជាច្រើន។ ក្នុងតំបន់មួយនៅភាគខាងលិចក្រុង Mandalay ផ្ទះសម្បែងរាប់សិបខ្នងត្រូវខូចខាត ដោយបង្ខំឱ្យអ្នកស្រុកសម្រាកនៅទីវាល និងត្រូវរកទីជម្រកថ្មី ដោយសារផ្គររន្ទះនាពេលថ្មីៗនេះ។

គិតត្រឹមល្ងាចថ្ងៃចន្ទ ០៧ មេសា ចំនួនអ្នកស្លាប់ដោយសារការរញ្ជួយដីនៅមីយ៉ាន់ម៉ា បានកើនឡើងដល់ ៣.៦០០នាក់ ដោយមនុស្សចំនួន ៥.០១៧នាក់បានរងរបួស និង ១៦០នាក់នៅតែបាត់ខ្លួន នេះបើយោងតាមក្រុមព័ត៌មាននៃក្រុមប្រឹក្សារដ្ឋបាលរដ្ឋរបស់មីយ៉ាន់ម៉ា៕