ប្រធានាធិបតីអាមេរិកលោក លោក Donald Trump និងនាយករដ្ឋមន្ត្រីអ៊ីស្រាអែល លោក Benjamin Netanyahu បានលើកឡើងកាលពីថ្ងៃចន្ទ (០៧ មេសា) ថា កិច្ចចរចាថ្មីកំពុងដំណើរការក្នុងគោលបំណងនាំយកចំណាប់ថ្នូរកាន់តែច្រើនមកវិញពីក្នុងដៃក្រុមសកម្មប្រយុទ្ធហាម៉ាស នៅតំបន់ហ្កាហ្សា។

អំឡុងទស្សនកិច្ចនៅសហរដ្ឋអាមេរិក លោក Netanyahu បានប្រាប់អ្នកយកព័ត៌មានថា "ឥឡូវនេះ អ៊ីស្រាអែលកំពុងធ្វើការលើកិច្ចព្រមព្រៀងមួយផ្សេងទៀត ដែលសង្ឃឹមថានឹងបានជោគជ័យ ហើយអ៊ីស្រាអែលប្តេជ្ញាថានឹងយកចំណាប់ថ្នូរទាំងអស់មកវិញ"។ ចំណែកលោក Trump ក៏និយាយថា "អាមេរិកកំពុងព្យាយាមយ៉ាងខ្លាំងលើរឿងនេះ ហើយក៏កំពុងសម្លឹងមើលបទឈប់បាញ់មួយផ្សេងទៀត ដែលអាចកើតឡើង"។

លោក Netanyahu ដែលអង្គុយក្បែរលោក Trump ក្នុងការិយាល័យ Oval Office បានគូសបញ្ជាក់ពីកិច្ចព្រមព្រៀងដោះលែងចំណាប់ថ្នូរនោះ ដែលបានចរចាដោយផ្នែកដោយបេសកជនប្រចាំតំបន់របស់លោក Trump គឺលោក Steve Witkoff ថា "អាចនាំយកមនុស្ស ២៥នាក់មកវិញបាន" ប៉ុន្តែមិនបញ្ជាក់លម្អិតឡើយ។

គួរឱ្យដឹងថា ក្នុងចំណោមចំណាប់ថ្នូរ ២៥១នាក់ ដែលត្រូវចាប់ខ្លួនអំឡុងពេលការវាយប្រហារថ្ងៃទី០៧ ខែតុលា របស់ក្រុមហាម៉ាស ពេលនេះមាន ៥៨នាក់នៅតែជាប់ឃុំឃាំងនៅហ្កាហ្សា ដោយក្នុងនោះមាន ៣៤នាក់ដែលយោធាអ៊ីស្រាអែលជឿថាបានស្លាប់។ បទឈប់បាញ់ដ៏ផុយស្រួយមានស្រាប់មួយដែលរកបានយ៉ាងលំបាកកាលពីខែមករា ត្រូវបញ្ចប់ដោយសារតែការវាយប្រហារផ្លូវអាកាសឡើងវិញរបស់អ៊ីស្រាអែល លើតំបន់ហ្កាហ្សា នៅថ្ងៃទី១៨ ខែមីនា៕