យ៉ាងហោចណាស់អ្នកស្វែងរកសិទ្ធិជ្រកកោនចំនួន ២៥០នាក់ ដែលត្រូវបានឃុំខ្លួន នៅមណ្ឌលមួយរបស់ចក្រភពអង់គ្លេស កំពុងប្តឹងរដ្ឋាភិបាលចំពោះការឃុំខ្លួនដោយខុសច្បាប់ បន្ទាប់ពីមានព័ត៌មានលេចឡើង ថា ទីតាំងនេះ មានមនុស្សច្រើនពេក ដែលអាចមានគ្រោះថ្នាក់ និងប្រឈមនឹងការផ្ទុះឡើងនៃជំងឺឆ្លង។

សារព័ត៌មាន The Guardian បានរាយការណ៍កាលពីថ្ងៃចន្ទថា មជ្ឈមណ្ឌលសិទ្ធិជ្រកកោន Manston នៅទីក្រុង Kent ដែលប្រើប្រាស់ដោយក្រសួងមហាផ្ទៃ ដើម្បីរៀបដំណើរការសម្រាប់មនុស្ស ដែលបានឆ្លងទន្លេ English Channel តាមទូកតូចៗ ត្រូវបានមន្ត្រីសហជីពពិពណ៌នាថា ជា «វិបត្តិមនុស្សធម៌នៅលើទឹកដីអង់គ្លេស»។  

លោក David Neal អតីតប្រធានអធិការកិច្ចឯករាជ្យនៃព្រំដែន និងអន្តោប្រវេសន៍ បាននិយាយថា លោក«និយាយមិនចេញ» បន្ទាប់ពីបានឃើញលក្ខខណ្ឌ នៅក្នុងមជ្ឈមណ្ឌល Manston ។

លោក Andy Baxter មន្ត្រីជាន់ខ្ពស់នៃសមាគមមន្ត្រីពន្ធនាគារ ក៏បានថ្កោលទោសលក្ខខណ្ឌ នៅមជ្ឈមណ្ឌល នេះផងដែរ បន្ទាប់ពីត្រូវបានព្រមានដោយសមាជិកសហជីព ដែលធ្វើការនៅទីនោះ

លោកបានពណ៌នាមជ្ឈមណ្ឌល Manston ថា ស្រដៀងនឹងជំរំជនភៀសខ្លួនមួយ នៅក្នុងប្រទេសដែលមិនស្ថិរភាព បន្ទាប់ពីបានទៅមើលមជ្ឈមណ្ឌលនេះ ដែលលោកបាននិយាយថា «កំពុងស្ថិតក្នុងស្ថានភាពវិបត្តិ»។