ទ្រព្យសម្បត្តិរបស់ប្រធានក្រុមហ៊ុន Tesla លោក Elon Musk បានធ្លាក់នៅចុះក្រោម ៣០០ពាន់លានដុល្លារអាមេរិកជាលើកដំបូង គិតចាប់តាំងពីខែវិច្ឆិកា ឆ្នាំ២០២៤ ខណៈដែលផលប៉ះពាល់យ៉ាងទូលំទូលាយពីការដំឡើងពន្ធរបស់ប្រធានាធិបតីអាមេរិក លោក Donald Trump បានកើតមានលើសូម្បីតែអ្នកដែលជិតស្និទ្ធបំផុតជាមួយលោក។

បើយោងតាមសន្ទស្សន៍ទ្រព្យសម្បត្តិមហាសេដ្ឋីរបស់សារព័ត៌មាន Bloomberg បានបង្ហាញថា លោក Musk បានបាង់បង់ប្រាក់ចំនួន ៤,៤ពាន់លានដុល្លារ កាលពីថ្ងៃទី៧ ខែមេសា បន្ទាប់ពីភាគហ៊ុនរបស់ក្រុមហ៊ុន Tesla បានបន្តខាតបង់ ដោយទ្រព្យសម្បត្តិសរុបរបស់លោកបានធា្លក់មកនៅ ២៩៧,៨ពាន់លានដុល្លារ។

ចំនួននោះបានកើតមានឡើងបន្ទាប់ពីការខាតបង់ ៣១ពាន់លានដុល្លារ ពេញទាំងថ្ងៃទី៣ និងទី៤ ខែមេសា។ ដូច្នេះ រហូតមកដល់ពេលនេះ ក្នុងឆ្នាំ២០២៥ លោក Musk បានខាតបង់ទឹកប្រាក់ចំនួន ១៣៤,៧ពាន់លានដុល្លារ។

លោក Musk គឺជាអ្នកខាតបង់ទឹកប្រាក់ដ៏ច្រើនបំផុតទី៦ នៅក្នុងបញ្ជីអ្នកមានទ្រព្យសម្បត្តិច្រើនបំផុតទាំង ៥០០រូបរបស់ពិភពលោកនៃសារព័ត៌មាន Bloomberg កាលពីថ្ងៃទី៧ ខែមេសា។ សរុបមក សន្ទស្សន៍ទ្រព្យសម្បត្តិបានធ្លាក់ចុះ ២៧១ពាន់លានដុល្លារ ដែលជាថ្ងៃដ៏អាក្រក់បំផុតទី៣ មិនធ្លាប់មានរបស់សន្ទស្សន៍។

ភាគហ៊ុន Tesla បានហក់ឡើងបន្ទាប់ពីការជាប់ឆ្នោតរបស់លោក Trump ដោយជំរុញឲ្យទ្រព្យសម្បត្តិរបស់លោក Musk កើនឡើងខ្ពស់។ ប៉ុន្តែចាប់តាំងពីលោកមានតួនាទីជាទីប្រឹក្សារបស់លោក Trump បានធ្វើឲ្យក្រុមហ៊ុន Tesla ក្លាយជាគោលដៅ សម្រាប់ការតវ៉ា និងការបំផ្លិចបំផ្លាញ ទាំងនៅក្នុងប្រទេស និងក្រៅប្រទេស៕