លោកប្រធានាធិបតី Donald Trump កាលពីថ្ងៃចន្ទ (ទី៧ ខែមេសា) បានណែនាំក្រុមប្រឹក្សាសន្តិសុខជាតិដ៏មានឥទ្ធិពលរបស់សហរដ្ឋអាមេរិកពិនិត្យមើលជាថ្មីនូវការដេញថ្លៃទិញក្រុមហ៊ុនដែកថែប US Steel ពីក្រុមហ៊ុន Nippon Steel ដើម្បីជួយកំណត់ថា តើត្រូវមាន «វិធានការបន្ថែមទៀត» ដែរ ឬយ៉ាងណា ដោយធ្វើឲ្យមានក្តីសង្ឃឹមកាន់តែខ្ពស់ ក្នុងការទទួលបានការអនុញ្ញាតដែលពិបាកនឹងកើតមាន សម្រាប់កិច្ចព្រមព្រៀងនេះ។

អនុស្សរណៈរបស់លោកប្រធានាធិបតីសរសេររៀបរាប់ថា៖ «ខ្ញុំបង្គាប់ឲ្យគណៈកម្មាធិការវិនិយោគបរទេសនៅសហរដ្ឋអាមេរិក ពិនិត្យការទិញក្រុមហ៊ុនដែកថែបរបស់សហរដ្ឋអាមេរិកដោយក្រុមហ៊ុន Nippon Steel ដើម្បីជួយឲ្យខ្ញុំអាចកំណត់ថា តើការមានវិធានការបន្ថែមទៀតក្នុងបញ្ហានេះ អាចសមស្រប ឬទេ»។

ពាក់ព័ន្ធនឹងការបញ្ជាឲ្យពិនិត្យនេះ ទាំងក្រុមហ៊ុន US Steel និង Nippon Steel មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ សេចក្តីណែនាំរបស់សេតវិមាន បានធ្វើឲ្យតម្លៃភាគហ៊ុនរបស់ដែកថែបអាមេរិក ហក់ឡើងជាង ១៣ភាគរយ ខណៈដែលវិនិយោគិនបានយល់ថា នេះជាសញ្ញាដែលរដ្ឋបាលរបស់លោក Trump កំពុងពិចារណាផ្ដល់ភ្លើងខៀវដល់ការការរួមបញ្ចូលគ្នានេះ បន្ទាប់ពីអតីតប្រធានាធិបតី លោក Joe Biden បានរារាំងការចងសម្ព័ន្ធគ្នា កាលពីខែមករា ដោយសារហេតុផលសន្តិសុខជាតិ៕