​អាហ្វ្រិក​ខាងត្បូង៖ ប្រទេស​អាហ្វ្រិក​ខាងត្បូង​បាន​ព​ន្លឿ​ន​យុទ្ធនា​ការ​ចាក់​វ៉ាក់សាំង​បង្ការ​វីរុស COVID-19 របស់​ខ្លួនដោយ​ដាក់​ទីតាំង​ចាក់​វ៉ាក់សាំង​នៅ​មជ្ឈមណ្ឌល​ផ្សារ​ទំនើប និង​មជ្ឈមណ្ឌល​ដឹកជញ្ជូន ដើម្បី​ទប់ស្កាត់​ការ​កើន​ឡើង​ឆាប់រហ័ស​នៃ​ករណី​ថ្មី​មួយ​សប្ដាហ៍ ​បន្ទាប់ពី​ការ​រក​ឃើញ​វីរុស​ប​ម្លែ​ង​ខ្លួន​ថ្មី Omicron នៅ​ក្នុង​ប្រទេស​។

ខេត្ត Gauteng ដែល​ជា​មជ្ឈមណ្ឌល​សេដ្ឋកិច្ច​របស់​ប្រទេស ជា​ចំណុច​ក្តៅសម្រាប់​ករណី​ឆ្លង​ដែល​មាន​ជាង ៧០% នៃ​ករណី​ថ្មី​។ លោក David Makhura រដ្ឋមន្ត្រី​ខេត្ត Gauteng បាន​និយាយ​ថា ខេត្ត​កំពុង​បង្កើន​គ្រែ​នៅ​មន្ទីរពេទ្យ និង​បើក​មន្ទីរពេទ្យ​តាម​តំបន់​មួយ​ចំនួន​ឡើងវិញ ក្នុង​ការ​ប្រមើល​មើល​ពី​ការ​កើន​ឡើង​ចំនួន​អ្នកជំងឺ COVID-19​។​ ​ការ​ធ្វើ​តេស្ត​បង្ហាញ​ថា ​វីរុស​ប​ម្លែ​ង​ថ្មី Omicron កំពុង​រីក​រាលដាលយ៉ាង​ឆាប់រហ័ស ហើយ​បច្ចុប្បន្ន​នេះ​ស្ថិត​នៅ​ក្នុង​ខេត្ត​ចំនួន​ ៥ ​ក្នុងចំណោម​ខេត្ត​ចំនួន ៩ ​របស់​ប្រទេស​អាហ្វ្រិកខាងត្បូង​។ វា​នៅ​មិន​ទាន់បាន​គេ​ដឹង​ថា​ តើ​មាន​ប៉ុន្មាន​ករណី​ថ្មី​ជា​វីរុស​ប​ប្លែងខ្លួន​ថ្មី Omicron នោះ​ទេ​។ ទោះជា​យ៉ាងណាវា​ហាក់​ដូច​ជា​ថា​ វីរុស​បម្លែង​ខ្លួន​ថ្មី​ក្លាយ​ជាវីរុស​លេចធ្លោ​កើន​ឡើង​យ៉ាង​ឆាប់រហ័ស​។

យោង​តាម​សេចក្ដីថ្លែងការណ៍​ដែល​ចេញ​ដោយ​វិទ្យាស្ថាន​ជាតិ សម្រាប់​ជំងឺឆ្លង​បាន​និយាយ​ថា ៧៤% នៃ​ការ​ធ្វើ​សំណាក ២៤៩​​នាក់​ដែល​ត្រូវ​បាន​ធ្វើតេស្តកាលពី​ខែ​វិច្ឆិកា​ត្រូវ​រក​ឃើញ​ជា​វីរុស​បំប្លែង​ខ្លួន​ថ្មី Omicron ហើយ​ករណី​ឆ្លង​វីរុស COVID-19 បាន​កើន​ឡើង​ទ្វេដង​ពី​ជាង​ ៤​ពាន់ករណី​កាលពី​ថ្ងៃអង្គារដល់​ជាង ​៨​ពាន់​ករណី​កាលពី​ថ្ងៃ​ពុធ​។ យោង​តាម​ទីភ្នាក់ងារ​សុខភាព​អាហ្វ្រិក​ខាងត្បូង​បាន​ឲ្យ​ដឹង​ថា ទីភ្នាក់​ងារ​បាន​ពិនិត្យ​ឃើញ​ការ​ប្រឈម​នៃ​ការ​ឆ្លង​ឡើងវិញ​នៃ​វីរុស Covid-19 ប​ម្លែ​ងខ្លួន​ថ្មី Omicron ខ្ពស់​ជាង​វីរុស Delta និង​ Beta រហូតដល់ ​៣ដង​៕​

អត្ថបទ៖ ប៊ុនថន