អង្គការសប្បុរសធម៌គ្រូពេទ្យគ្មានព្រំដែន (MSF) បាននិយាយកាលពីថ្ងៃចន្ទថា ខ្លួនបានរកឃើញករណីដំបូងនៃកុមារដែលខ្វះអាហារូបត្ថម្ភ នៅក្នុងជំរំជនភៀសខ្លួនលើកោះ Samos ប្រទេសក្រិក ដែលត្រូវបានក្រុមសិទ្ធិមនុស្ស រិះគន់ចំពោះស្ថានភាពរស់នៅដ៏គ្រោះថ្នាក់។

អង្គការនេះ បានឲ្យដឹងថា ក្រុមគ្រូពេទ្យ MSF បានធ្វើរោគវិនិច្ឆ័យលើកុមារចំនួន ៦នាក់ មកពីប្រទេសស៊ីរី និងអាហ្វហ្គានីស្ថាន ដែលមានអាយុចន្លោះពី ៦ ខែដល់ ៦ ឆ្នាំ ជាមួយនឹងកង្វះអាហារូបត្ថម្ភយ៉ាងស្រួចស្រាវ ដែលត្រូវការជំនួយជាបន្ទាន់។

គ្រូពេទ្យគ្មានព្រំដែន (MSF) បាននិយាយថា ខណៈពេលដែលវាមិនអាចនិយាយថាតើកង្វះអាហារូបត្ថម្ភរបស់ពួកគេ ដោយសារតែការរស់នៅក្នុងជំរំនោះ លក្ខខណ្ឌនៅទីនោះ រួមទាំងអាហារមិនគ្រប់គ្រាន់ និងការថែទាំវេជ្ជសាស្រ្ត បានបង្កគ្រោះថ្នាក់ដល់សុខភាពរបស់ពួកគេ។

លោកស្រី Christina Psarra អគ្គនាយកនៃអង្គការ MSFនៅប្រទេសក្រិក បាននិយាយថា៖ «គ្មានកុមារណាម្នាក់ គួរទទួលរងការឈឺចាប់ពីកង្វះអាហារូបត្ថម្ភ ដោយសារតែការមិនយកចិត្តទុកដាក់ជាប្រព័ន្ធ» ដោយអំពាវនាវឲ្យចាត់វិធានការភ្លាមៗ ហើយបន្ថែមថា ប្រហែលមួយភាគបួននៃអ្នករស់នៅជំរំ គឺជាកុមារ។

ក្រសួងទេសន្តរប្រវេសន៍ក្រិក បាននិយាយថា ករណីទាំងនេះ ត្រូវបានដាក់ឲ្យនៅដាច់ដោយឡែក។