រដ្ឋមន្រ្តីការពារជាតិសហរដ្ឋអាមេរិកលោក Pete Hegseth បានចុះចតនៅប្រទេសប៉ាណាម៉ាកាលពីយប់ថ្ងៃចន្ទ មុនកិច្ចប្រជុំសន្តិសុខអាមេរិកកណ្តាល ។

រដ្ឋមន្រ្តីសន្តិសុខសាធារណៈប៉ាណាម៉ាលោក Frank Alexis Abrego បានស្វាគមន៍លោក Hegseth ពេលរូបលោកចុះចតនៅទីក្រុងប៉ាណាម៉ា ។

យោងតាមការអះអាងរបស់មន្ទីរបច្ចកោណ បានឲ្យដឹងថា គេរំពឹងថា លោក Hegseth នឹងចូលរួមកិច្ចប្រជុំទេ្វភាគី អំឡុងសន្និសីទ ដើម្បីពន្លឿនកិច្ចខិតខំពង្រឹងភាពជាដៃគូជាមួយប៉ាណាម៉ា និងប្រទេសដទៃទៀតនៅអាមេរិកកណ្តាល ក៏ដូចជាលើកកម្ពស់ចក្ខុវិស័យរួម សម្រាប់សន្តិភាព និងសន្តិសុខក្នុងតំបន់ ។

ប្រធានាធិបតីសហរដ្ឋអាមេរិកលោក Donald Trump បាននិយាយម្តងហើយម្តងទៀតថា លោកចង់បានព្រែកជីកប៉ាណាម៉ាត្រឡប់មកវិញ ដែលគេចាត់ទុកថា ស្ថិតក្នុងចំណោមផ្លូវទឹកយុទ្ធសាស្រ្តដ៏សំខាន់បំផុតរបស់ពិភពលោក ប៉ុន្តែលោកពុំបានបង្ហាញពីវិធីសាស្រ្តច្បាស់លាស់ក្នុងការដណ្តើមគ្រប់គ្រងវានោះឡើយ ឬថាតើវិធានការយោធាអាចនឹងត្រូវការដែរឬទេ ៕