ប្រធានឧទ្យាន និងមន្រ្តីក្នុងស្រុក និយាយនៅថ្ងៃអង្គារនេះថា សត្វដំរីទឹកយ៉ាងហោច ៥០ក្បាល និងសត្វមាឌធំដទៃជាច្រើនក្បាលទៀត ត្រូវបានសម្លាប់ដោយសារជំងឺអង់ត្រាក់ នៅឧទ្យានជាតិ Virunga ស្ថិតនៅតំបន់ភាគខាងកើតកុងហ្គោ ហើយខ្មោចរបស់ពួកវាអណ្តែតតាមស្ទឹង Ishasha ចូលទៅក្នុងទឹកបឹង ។

រូបថតសន្លឹកចែករំលែកដោយឧទ្យានឃើញសត្វដំរីទឹកអណ្តែតតាមទឹក និងប្រឡាក់ភក់នៅមាត់ស្ទឹង ។

ការងាប់នេះតំណាងឲ្យការបាត់បង់ដ៏ធំមួយសម្រាប់ឧទ្យានជាតិ Virunga ដែលមានសត្វដំរីទឹកប្រហែល ១.២០០ក្បាល និងពិបាករក្សាចំនួនសត្វទាំងនេះដែលរងការគំរាមកំហែងអស់រយៈពេលជាច្រើនទសវត្សរ៍មកហើយដោយសារការបរបាញ់សត្វ ។

ឆ្មាំឧទ្យានបានកត់សំគាល់ឃើញថាមានបញ្ហា ពេលដែលសត្វដំរីទឹកចាប់ផ្តើមឡើងគោកកាលពីរយៈពេល ៥ថ្ងៃមុននៅតាមមាត់ស្ទឹង ដែលជាប់ព្រំដែនជាមួយប្រទេសអ៊ូហ្គង់ដា ហើយនិងហូរឆ្លងកាត់តំបន់គ្រប់គ្រងដោយក្រុមឧទ្ទាម ។

លោក Emmanuel De Merode គឺជាប្រធានឧទ្យានជាតិ Virunga បាននិយាយថា ការធ្វើតេស្តបញ្ជាក់ពីការពុលជំងឺអង់ត្រាក់ ។ លោកបន្តថា ក្របីត្រូវបានសម្លាប់ផងដែរ ប៉ុន្តែលោកពុំបានផ្តល់តួលេខជាក់លាក់នោះទេ ៕