រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា ប្រទេសអ៊ីរ៉ង់បានត្រៀមខ្លួនរួចជាស្រេចដើម្បីចូលរួមជាមួយសហរដ្ឋអាមេរិកនៅក្នុងកិច្ចពិភាក្សាជុំវិញកម្មវិធីនុយក្លេអ៊ែររបស់ខ្លួនក្នុងគោលបំណងដើម្បីទទួលបានកិច្ចព្រមព្រៀង ។

ប៉ុន្តែលោក Araghchi បាននិយាយថា ប៉ុន្តែប្រធានាធិបតីអាមេរិក Donald Trump ត្រូវតែយល់ស្របជាមុនសិនថា មិនអាចមាន "ជម្រើសយោធា" ហើយបានបន្ថែមថា អ៊ីរ៉ង់នឹង "មិនទទួលយកការបង្ខិតបង្ខំ" នោះទេ។  

លោកក៏បានទទូចផងដែរថាការចរចានៅប្រទេសអូម៉ង់ថ្ងៃ១១មេសា នឹងមានលក្ខណៈប្រយោល ដែលផ្ទុយពីសេចក្តីប្រកាសដ៏គួរឱ្យភ្ញាក់ផ្អើលរបស់លោក Trump កាលពីថ្ងៃចន្ទថា ពួកគេនឹងមានការចរចាដោយផ្ទាល់។

លោក Trump ដែលបានដកសហរដ្ឋអាមេរិកចេញពីកិច្ចព្រមព្រៀងនុយក្លេអ៊ែរឆ្នាំ ២០១៥ រវាងអ៊ីរ៉ង់ និងមហាអំណាចពិភពលោកមួយចំនួន ក្នុងអំឡុងអាណត្តិដំបូងរបស់លោកបានព្រមានថាអ៊ីរ៉ង់នឹងស្ថិតក្នុង "គ្រោះថ្នាក់ដ៏ធំ" ប្រសិនបើការចរចាមិនទទួលបានជោគជ័យ។

សហរដ្ឋអាមេរិក និងអ៊ីរ៉ង់ ពុំមានទំនាក់ទំនងការទូតទេ ដូច្នេះកាលពីខែមុន លោក Trump បានផ្ញើលិខិតមួយទៅកាន់មេដឹកនាំកំពូលរបស់អ៊ីរ៉ង់ តាមរយៈប្រទេសអារ៉ាប់រួម។ លិខិតនោះបាននិយាយថាលោកចង់បានកិច្ចព្រមព្រៀងមួយដើម្បីទប់ស្កាត់អ៊ីរ៉ង់មិនឲ្យទទួលបានអាវុធនុយក្លេអ៊ែរ និងដើម្បីទប់ស្កាត់ការវាយប្រហារយោធា ដែលអាចកើតមានដោយសហរដ្ឋអាមេរិក និងអ៊ីស្រាអែល។ 

លោក Trump បានបង្ហើបការចរចានាពេលខាងមុខក្នុងអំឡុងពេលដំណើរទស្សនកិច្ចទៅកាន់សេតវិមានកាលពីថ្ងៃចន្ទដោយនាយករដ្ឋមន្រ្តីអ៊ីស្រាអែលលោក Benjamin Netanyahu ដែលបាននិយាយកាលពីថ្ងៃអង្គារថាមេដឹកនាំទាំងពីរបានយល់ព្រមថា "អ៊ីរ៉ង់នឹងមិនមានអាវុធនុយក្លេអ៊ែរ" ហើយបានបន្ថែម "ជម្រើសយោធា" នឹងកើតឡើងប្រសិនបើការចរចាត្រូវបានអូសបន្លាយ៕