ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃពុធ (០៩ មេសា) នេះ ដោយដកស្រង់សម្ដីប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើងថា ស្ថានភាពរបស់កូរ៉េខាងជើង ជារដ្ឋមានអាវុធនុយក្លេអ៊ែរ មិនអាចផ្លាស់ប្តូរឡើយ ទោះបីជាអាមេរិក និងសម្ព័ន្ធមិត្តអាស៊ីរបស់ខ្លួន ទាមទារឱ្យរំសាយយ៉ាងណាក៏ដោយ។

សេចក្ដីអត្ថាធិប្បាយ ដែលទីភ្នាក់ងារព័ត៌មានរដ្ឋ KCNA និយាយថាត្រូវបានចេញផ្សាយកាលពីថ្ងៃអង្គារនេះ ទំនងជាការឆ្លើយតបទៅនឹងសេចក្តីថ្លែងការណ៍រួមរបស់រដ្ឋមន្ត្រីការបរទេសកូរ៉េខាងត្បូង ជប៉ុន និងសហរដ្ឋអាមេរិក ដែលបានធ្វើឡើងនៅខាងក្រៅកិច្ចប្រជុំរបស់អង្គការណាតូកាលពីសប្តាហ៍មុន។

សេចក្តីថ្លែងការណ៍រួមនោះបានឱ្យដឹងថា រដ្ឋមន្ត្រីការបរទេសទាំងបីបានអះអាងជាថ្មីនូវ "ការប្តេជ្ញាចិត្តចំពោះការរំសាយអាវុធនុយក្លេអ៊ែរទាំងស្រុង" របស់កូរ៉េខាងជើង។

លោកស្រី Kim Yo Jong ប្អូនស្រីរបស់មេដឹកនាំកូរ៉េខាងជើង Kim Jong Un បានលើកឡើងថា ជំហរនៃរដ្ឋអាវុធនុយក្លេអ៊ែររបស់កូរ៉េខាងជើង រួមជាមួយនឹង "ការរារាំងនុយក្លេអ៊ែរដ៏ច្រើន និងខ្លាំងក្លា" របស់ខ្លួន គឺដោយសារការគំរាមកំហែងអរិភាពពីខាងក្រៅ ហើយ "ឋានៈនេះមិនផ្លាស់ប្តូរទេ ទោះជានរណាម្នាក់បដិសេធយ៉ាងណាក៏ដោយ" នេះបើយោងតាម KCNA។

កូរ៉េខាងជើង បានបន្តបង្កើតអាវុធនុយក្លេអែរ ក្រោយរងទណ្ឌកម្មពីក្រុមប្រឹក្សាសន្តិសុខអង្គការសហប្រជាជាតិក្នុងពេលជាច្រើនឆ្នាំ ដោយសារប្រទេសនេះបានសាកល្បងបំផ្ទុះនុយក្លេអ៊ែរនៅក្រោមដីជាលើកដំបូងក្នុងឆ្នាំ២០០៦។ តាំងពីពេលនោះមក ទីក្រុងព្យុងយ៉ាងត្រូវគេជឿថាបានបង្កើតឃ្លាំងអាវុធនុយក្លេអ៊ែរដ៏ធំ ទោះមិនបានធ្វើតេស្តនុយក្លេអ៊ែរក្នុងបរិយាកាសក៏ដោយ៕