សហរដ្ឋអាមេរិក បានបង្កើនយុទ្ធនាការយោធារបស់ខ្លួនប្រឆាំងនឹងទីតាំងនៃកងកម្លាំងរបស់ក្រុមហ៊ួទី ក្នុងប្រទេសយេម៉ែន ដោយបានធ្វើការវាយប្រហារតាមអាកាសចំនួន ២២លើក នៅទូទាំងភាគខាងជើងប្រទេសនេះ កាលពីព្រឹកថ្ងៃអង្គារ។

រលកចុងក្រោយនៃការវាយប្រហារនេះ បានផ្តោតទៅលើតំបន់ភាគខាងកើត និងភាគខាងត្បូងនៃរដ្ឋធានី Sanaa កោះ Kamaran ក្នុងសមុទ្រក្រហម និងខេត្ត Marib ដែលសម្បូរដោយប្រេង។ នេះបើយោងតាមរបាយការណ៍ពីទូរទស្សន៍ហ៊ួទី al-Masirah និងអ្នកស្រុក។

ក្រុមសាក្សីបានពណ៌នាការវាយប្រហារនេះថា មានឥទ្ធិពលខ្លាំងក្លា និងដ៏ឃោរឃៅ បើទោះជាមិនមានអ្នករងរបួស ត្រូវបានរាយការណ៍ភ្លាមៗ ពីប្រតិបត្តិការកាលពីថ្ងៃអង្គារក៏ដោយ។ ការកើនឡើងភាពតានតឹងនេះ បានកើតឡើង បន្ទាប់ពីការវាយប្រហារតាមអាកាសកាលពីយប់ថ្ងៃអាទិត្យ ដែលបានរាយការណ៍ថា បានសម្លាប់កុមារ ៤នាក់ និង ២៥នាក់ផ្សេងទៀត រងរបួស នៅក្នុងទីក្រុង Sanaa។

តាមសេចក្តីរាយការណ៍ យុទ្ធនាការផ្លូវអាកាសរបស់អាមេរិកបច្ចុប្បន្នដែលបានចាប់ផ្តើម នៅថ្ងៃទី ១៥ ខែ    មីនា មានគោលបំណងបញ្ឈប់ការវាយប្រហាររបស់ក្រុមហ៊ួទីលើការដឹកជញ្ជូនអន្តរជាតិ នៅសមុទ្រក្រហម ជាពិសេសក្រុមដែលអះអាងថា មានទំនាក់ទំនងជាមួយអ៊ីស្រាអែល។

ទោះបីជាមានការវាយលុករបស់សហរដ្ឋអាមេរិកឥតឈប់ឈរក៏ដោយ ក៏អ្នកវិភាគយោធាយេម៉ែនបានបញ្ជាក់ថា ការវាយប្រហារតាមអាកាសទាំងនេះ បានបរាជ័យ ក្នុងការរារាំងក្រុមហ៊ួទី ដែលបានបន្តកំណត់គោលដៅផលប្រយោជន៍អាមេរិក និងអ៊ីស្រាអែល នៅក្នុងតំបន់។