​​ស្នូកឃ័រ៖ ​ម្ចាស់​ជើងឯក​ស្នូកឃ័រ UK Championship ៧​សម័យ Ronnie O’Sullivan បាន​កក់​កៅអី​នៅ​វគ្គ ៨នាក់​ចុងក្រោយ​បន្ទាប់ពី​យកឈ្នះ​កីឡាករ​ថៃ Noppon Saengkham​។ ​ការប្រកួត​រវាង​អ្នក​ទាំងពីរ​មាន​សភាព​តានតឹង ៤ហ្វ្រេ​ម​ដំបូង​បន្ទាប់ពី​ស្មើគ្នា ២-២ហ្វ្រេ​ម​។ ​​ហ្វ្រេ​ម​ទី៥ Noppon Saengkham បាន​នាំមុខ ៣-២ តែ​ក៏ត្រូវ O’Sullivan វាយបក​យកឈ្នះ ៤ហ្វ្រេ​ម​ផ្ទួនៗបូករួម​ទាំង​មួយ​ហ្វ្រេ​ម​ដែល​ធ្វើបាន​មួយ​ឈើ​លើសពី ១០០ពិន្ទុ​ដើម្បី​យកឈ្នះ​ការប្រកួត ៦-៣ហ្វ្រេ​ម​។

​Ronnie O’Sullivan នឹង​បន្តដំណើរ​ទៅ​វគ្គ ៨នាក់​ចុងក្រោយ​ដោយ​នឹងត្រូវ​ជួប​ជាមួយ Kyren Wilson ដែល​ធ្លាប់​ជួបគ្នា​កាលពី​វគ្គ​ផ្តាច់ព្រ័ត្រ​ជើងឯក​ពិភពលោក​ឆ្នាំ២០២០​។ ​Kyren Wilson បាន​យកឈ្នះ​មិត្ត​រួម​ជាតិ​អង់គ្លេស Ben Woollaston ៦-៣ហ្វ្រេ​ម​ផងដែរ​កាលពី​ថ្ងៃ​ព្រហស្បតិ៍​ម្សិលមិញ​។ ​​ចំណែក​លទ្ធផល​ផ្សេងទៀត​មាន​កីឡាករ​ស្កុ​ត​ឡេ​ន Anthony McGill យកឈ្នះ​កីឡាករ​អៀក​ឡង់​ខាងជើង Jordan Browne ៦-៣ បន្ត​ជួប​ជាមួយ​កីឡាករ​អង់គ្លេស Anthony Hamilton រឺក៏​កីឡាករ​ប៊ែ​ល​ហ្ស៊ិ​ក Luca Brecel​។​ ​ចំណែកឯ​កីឡាករ​ចិន Zhao Xintong យកឈ្នះ Peter Lines ៦-៤ ឡើង​ជួប​ជាមួយ​កីឡាករ​អង់គ្លេស Jack Lisowski រឺ​កីឡាករ​អ៊ីរ៉ង់ Hossein Vafaei៕

​អត្ថបទ​៖​នាង សុភា​វុ​ធ