ភាពភ័យខ្លាច ការទម្លាក់គ្រាប់បែក សម្រែកតក់ស្លុត កង្វះខាត និងការភៀសខ្លួនឥតឈប់ឈរ បានវាយប្រហារទាំងផ្លូវកាយ និងផ្លូវចិត្តលើជនជាតិប៉ាឡេស្ទីនរាប់សែននាក់នៅតំបន់ហ្កាហ្សាស្ទ្រីប ដែលរងការវាយប្រហារជាថ្មីរបស់អ៊ីស្រាអែល កាលពី ៣សប្តាហ៍មុន និងបានបង្កឱ្យមានការជម្លៀសដ៏ធំ និងភាពអស់សង្ឃឹមបន្ថែមទៀតក្នុងការស្វែងរកទីជម្រក។

អ្នកស្រុកហ្កាហ្សានៅកណ្តាលទីក្រុង az-Zawayda ដែលបានភៀសខ្លួនពីការទម្លាក់គ្រាប់បែកនៅភាគខាងជើងបាននិយាយថា "អ៊ីស្រាអែលប្រាប់ឱ្យជម្លៀស ប៉ុន្តែតើពលរដ្ឋប៉ាឡេស្ទីនអាចរត់ទៅទីណាបាន ព្រោះមិនមានកន្លែងសុវត្ថិភាពដែលអាចគេចខ្លួនបានទេ" ដោយចង្អុលទៅបញ្ជីតំបន់ជម្លៀសក្បែរនោះជាច្រើន ដែលចេញផ្សាយដោយកងទ័ពអ៊ីស្រាអែល។

ចាប់តាំងពីការវាយប្រហារជាថ្មី និងប្រតិបត្តិការជើងគោក កងទ័ពអ៊ីស្រាអែលបានចេញបញ្ជាជម្លៀសច្រើនលើកសម្រាប់ទីតាំងនៅភាគខាងជើង ភាគខាងត្បូង និងកណ្តាលនៃតំបន់ហ្កាហ្សាស្ទ្រីប ដោយព្រមានអ្នកស្រុកអំពីការវាយប្រហារដែលជិតមកដល់នៅទីនោះ។

អង្គការសហប្រជាជាតិ បាននិយាយនៅថ្ងៃចន្ទ (០៧ មេសា) ថា ប្រជាជនហ្កាហ្សាជិត ៤០០.០០០នាក់ ត្រូវបានភៀសខ្លួនចាប់តាំងពីថ្ងៃទី១៨ ខែមីនា មក ជាពេលវេលាដែលអ៊ីស្រាអែល បន្តការវាយប្រហារយ៉ាងខ្លាំងក្លាជាថ្មីនៅតំបន់ហ៊ុមព័ទ្ធនោះ។ ក្រសួងសុខាភិបាលហ្កាហ្សា ដែលគ្រប់គ្រងដោយក្រុមហាម៉ាស និយាយនៅថ្ងៃអង្គារ (០៨ មេសា) ថា ជនជាតិប៉ាឡេស្ទីនប្រមាណ ១.៤៤៩នាក់ បានស្លាប់ក្នុងប្រតិបត្តិការថ្មីរបស់អ៊ីស្រាអែល ដែលនាំឱ្យចំនួនអ្នកស្លាប់សរុបចាប់តាំងពីសង្គ្រាមចាប់ផ្តើមមក ឡើងលើសពី ៥០.៨០០នាក់៕