សាក្សីបាននិយាយថា រថយន្តនគបាលត្រូវបានដុតបំផ្លាញ ហើយអគារជាច្រើនកន្លែងក៏ត្រូវបានធ្វើឲ្យខូចខាត នៅក្នុងទីក្រុង Murshidabad ភាគខាងកើតប្រទេសឥណ្ឌា កាលពីយប់ថ្ងៃអង្គារ ទី៨ ខែមេសា បន្ទាប់ពីមានការប៉ះទង្គិចគ្នា បានផ្ទុះឡើងរវាងក្រុមអ្នកតវ៉ាមូស្លីម និងកងកម្លាំងសន្តិសុខ។

ប្រជាជនមូស្លីមឥណ្ឌា បាននឹងកំពុងតវ៉ាប្រឆាំងសេចក្តីស្នើច្បាប់ថ្មី ដែលត្រូវបានអនុម័តដោយទាំងសភាជាន់ទាបនិងសភាជាន់ខ្ពស់ ខណៈគ្រោងនឹងកែប្រែស្ទើរទាំងស្រុងក្នុងការគ្រប់គ្រងប័ណ្ណកាន់កាប់ដីធ្លីដ៏ច្រើនដែលទុកសម្រាប់តែការប្រើប្រាស់របស់ពលរដ្ឋមូស្លីម។

ឧបទ្ទវហេតុនេះ បានកើតឡើងនៅពេលដែលក្រុមបាតុករ បានបិទផ្លូវជាតិដើម្បីធ្វើបាតុកម្ម។ សេចក្តីរាយការណ៍របស់ប្រព័ន្ធផ្សព្វផ្សាយក្នុងស្រុកនិយាយថា ក្រុមអ្នកតវ៉ា បានវាយប្រហារទៅលើបុគ្គលិកនគរបាលដែលកំពុងព្យាយាមដកចេញការរាំងផ្លូវ។ ដី និងទ្រព្យសកម្មនានា ស្ថិតនៅក្រោមប្រភេទ «waqf» ដែលមានន័យថា «នៅរក្សាទុក» ជាភាសាអារ៉ាប់ ហើយត្រូវបានធ្វើជាអំណោយទានដោយពលរដ្ឋមូស្លីម សម្រាប់គោលបំណងសាសនា អប់រំ ឬសប្បុរសធម៌។ ដីបែបនេះ មិនអាចផ្ទេរ ឬលក់បានឡើយ។

ទន្ទឹមនឹងនេះ ក្រុមអ្នកតវ៉ាមូស្លីមរាប់ពាន់នាក់ រួមមានទាំងស្ត្រីនៅភាគឦសានទីក្រុង Imphal បានលើកពាក្យស្លោកផ្សេងៗ ខណៈពួកគេបានដើរដង្ហែរក្បួនរួមគ្នាប្រឆាំងនឹងសេចក្តីស្នើច្បាប់នេះ។ ច្បាប់នេះ ធ្វើឡើងក្នុងពេលមានភាពតានតឹងរវាងសហគមន៍មូស្លីម និងរដ្ឋាភិបាលរបស់លោក Modi ។

សមាជិកសភាគណបក្សប្រឆាំង និងក្រុមឥស្លាម មើលឃើញថា សេចក្តីស្នើច្បាប់នេះ គឺជាផែនការមួយ ដើម្បីទទួលបានទ្រព្យសម្បត្តិ ដែលជាកម្មសិទ្ធិរបស់ពលរដ្ឋមូស្លីម និងធ្វើឱ្យសិទ្ធិគ្រប់គ្រងអចលនទ្រព្យរបស់ពួកគេចុះខ្សោយ ក្រោមរដ្ឋធម្មនុញ្ញរបស់ប្រទេសឥណ្ឌា។