មន្ត្រីក្រសួងការពារជាតិស៊ីរីម្នាក់ បាននិយាយកាលពីថ្ងៃអង្គារថា ក្រុមស៊ីរីគាំទ្រទួរគី បានកាត់បន្ថយវត្តមានយោធារបស់ពួកគេ នៅក្នុងតំបន់ប្រវត្តិសាស្ត្រភាគច្រើនជាជនជាតិឃើដនៃភាគខាងជើងរបស់ប្រទេសនេះ ដែលពួកគេបានគ្រប់គ្រង ចាប់តាំងពីឆ្នាំ ២០១៨ មក ។

ការសម្រេចនេះ បានកើតឡើង បន្ទាប់ពីកិច្ចព្រមព្រៀងមួយដែលបានចុះហត្ថលេខាកាលពីខែមុនរវាងអាជ្ញាធរថ្មីរបស់ប្រទេសស៊ីរី និងមន្ត្រីឃើដដែលផ្តល់ឲ្យវិលត្រឡប់មកវិញនូវជនភៀសខ្លួនឃើដ រួមទាំងមនុស្សរាប់ម៉ឺននាក់ ដែលបានភៀសខ្លួនចេញពីតំបន់ Afrin ក្នុងឆ្នាំ ២០១៨។

មន្ត្រីដែលសុំមិនបញ្ចេញឈ្មោះ ដោយសារពួកគេមិនត្រូវបានអនុញ្ញាតឲ្យនិយាយទៅកាន់ប្រព័ន្ធផ្សព្វផ្សាយ បានប្រាប់សារព័ត៌មាន AFP ថា ក្រុមដែលគាំទ្រទីក្រុងអង់ការ៉ា បាន«កាត់បន្ថយវត្តមានយោធា និងប៉ុស្តិ៍ត្រួតពិនិត្យរបស់ពួកគេ» នៅតំបន់ Afrin ក្នុងខេត្ត Aleppo។

មន្ត្រីរូបនេះ បាននិយាយថា វត្តមានរបស់ពួកគេត្រូវបាន «រក្សានៅក្នុងតំបន់សម្រាប់ពេលនេះ» ដោយបន្ថែមថា អាជ្ញាធរចង់ឲ្យពួកគេឈរជើង នៅក្នុងប៉ុស្តិ៍កងទ័ព ប៉ុន្តែទាំងនេះ គឺជាគោលដៅជាទៀងទាត់នៃការវាយប្រហាររបស់អ៊ីស្រាអែល។