ប្រភពដែលបានដឹងពីបញ្ហានេះ បានប្រាប់សារព័ត៌មាន CNN ថា ទីភ្នាក់ងារសហរដ្ឋអាមេរិក សម្រាប់ការអភិវឌ្ឍន៍អន្តរជាតិ (USAID) កាលពីថ្ងៃអង្គារ (ទី៨ ខែមេសា) បានផ្លាស់ប្តូរការសម្រេចរបស់ខ្លួន ដោយបានស្ដារឡើងវិញនូវកិច្ចសន្យាជំនួយមនុស្សធម៌សង្គ្រោះជីវិតរបស់កម្មវិធីស្បៀងអាហារពិភពលោក (WFP) មួយចំនួន បន្ទាប់ពីបានលុបចោលកាលពីចុងសប្តាហ៍។

ការកែប្រែនេះកើតមានឡើងបន្ទាប់ពី WFP បានព្រមានកាលពីថ្ងៃចន្ទថា ការកាត់បន្ថយនេះ អាច «ស្មើនឹងការកាត់ទោសប្រហារជីវិត ចំពោះមនុស្សរាប់លាននាក់ដែលប្រឈមមុខនឹងភាពអត់ឃ្លានធ្ងន់ធ្ងរ និងស្ថានភាពស្ទើរដាច់ពោះ»។ ទីភ្នាក់ងារអង្គការសហប្រជាជាតិមួយនេះ បានបញ្ជាក់ថា ខ្លួនបានទទួលការជូនដំណឹងពីរដ្ឋបាលរបស់លោក Donald Trump «ដែលប្រាប់ថា ការផ្តល់មូលនិធិ សម្រាប់ជំនួយស្បៀងអាហារសង្គ្រោះបន្ទាន់ នៅក្នុងប្រទេសចំនួន ១៤ ត្រូវបានបញ្ចប់»។

យោងតាមប្រភពដែលដឹងពីបញ្ហា បានឲ្យដឹងថា USAID បានស្ដារឡើងវិញនូវមូលនិធិរបស់ខ្លួន សម្រាប់កម្មវិធី WFP នៅក្នុងប្រទេសលីបង់ ស៊ីរី អ៊ីរ៉ាក់ ហ្ស៊កដានី អេក្វាឌ័រ និងសូម៉ាលី។ លោក Jeremy Lewin មន្ត្រីជាន់ខ្ពស់របស់ទីភ្នាក់ងារ USAID ដែលធ្វើការជាមួយក្រសួងប្រសិទ្ធភាពរដ្ឋាភិបាល បានស្នើសុំតាមរយៈអ៊ីម៉ែលកាលពីថ្ងៃអង្គារថា ការបញ្ឈប់គួរត្រូវបានលុបចោល។

ជាមួយគ្នានេះ ប្រភពបានឲ្យដឹងបន្ថែមទៀតថា កិច្ចសន្យាចំនួន ៤ផ្សេងទៀត ដែលគាំទ្រការងាររបស់អង្គការអន្តរជាតិ សម្រាប់ទេសន្តរប្រវេសន៍ នៅក្នុងតំបន់ប៉ាស៊ីហ្វិក ក៏ត្រូវបានស្តារឡើងវិញផងដែរ៕