មន្ត្រីជាន់ខ្ពស់ផ្នែកពាណិជ្ជកម្មរបស់សហរដ្ឋអាមេរិក កាលពីថ្ងៃអង្គារ (ទី៨ ខែមេសា) បាននិយាយការពារវិធានការដំឡើងពន្ធគយរបស់លោកប្រធានាធិបតី Donald Trump លើប្រទេសស្ទើរតែទាំងអស់ ដោយបានប្រាប់ទៅសមាជិកព្រឹទ្ធសភាអាមេរិកថា ដោយប្រទេសរាប់សិបកំពុងស្វែងរកកិច្ចព្រមព្រៀង យុទ្ធសាស្ត្រនេះ គឺ «ទទួលបានផ្លែផ្ការួចហើយ»។

ការបង្ហាញវត្តមានរបស់លោក Jamieson Greer នៅក្នុងសភា បានកើតមានឡើងស្របពេលដែលសមាជិកគណបក្សសាធារណរដ្ឋ បានបង្ហាញក្ដីបារម្ភ ជុំវិញសង្រ្គាមពាណិជ្ជកម្មដែលកំពុងកើនឡើងរបស់លោក Trump និងក្នុងពេលដែលទីផ្សារភាគហ៊ុន Wall Street ទាមទារនូវភាពច្បាស់លាស់ ពាក់ព័ន្ធនឹងផែនការរបស់លោកប្រធានាធិបតី បន្ទាប់ពីទីផ្សារធ្លាក់ចុះជាប្រវត្តិសាស្ត្រ។

ដោយសំដៅលើតួរលេខដែលមន្ត្រីរដ្ឋបាលផ្សេងទៀត បានលើកឡើងផងដែរនោះ លោក Greer បានប្រាប់គណៈកម្មាធិការហិរញ្ញវត្ថុព្រឹទ្ធសភាថា៖ «ប្រទេសជិត ៥០ បានមកជួបខ្ញុំដោយផ្ទាល់ ដើម្បីពិភាក្សាអំពីគោលនយោបាយថ្មីរបស់លោកប្រធានាធិបតី និងរិះរកវិធីធ្វើយ៉ាងណា ដើម្បីឲ្យសម្រេចបាននូវការធ្វើសម្បទានឲ្យគ្នាទៅវិញទៅមក»។

លោក Greer បានបញ្ជាក់ថា ប្រទេសជាច្រើន ដែលរួមមានទាំងអាហ្សង់ទីន វៀតណាម និងអ៊ីស្រាអែលផងដែរ បានស្នើកាត់បន្ថយកម្រិតពន្ធ ខណៈពេលដែលក្រុមហ៊ុនផលិតរថយន្ត កំពុងលុបចោលការបញ្ឈប់ការងារ ហើយក្រុមហ៊ុន បានប្រកាសអំពីការវិនិយោគថ្មីចំនួន ៤សែនកោដិលានដុល្លារ នៅសហរដ្ឋអាមេរិក៕