សមាជិកព្រឹទ្ធសភាសាធារណៈរដ្ឋអាមេរិកលោក Lindsey Graham អះអាងថា អ៊ីរ៉ង់មានសារធាតុអ៊ុយ រ៉ានីញ៉ូដែលត្រូវចម្រាញ់ដល់កម្រិតអាចផលិតអាវុធគ្រប់គ្រាន់ ដើម្បីបង្កើតគ្រាប់បែកនុយក្លេអ៊ែរចំនួន ៦គ្រាប់។

លោកបានប្រាប់សារព័ត៌មាន Fox News នៅក្នុងបទសម្ភាសន៍មួយថា៖«ពួកគេមានសារធាតុអ៊ុយរ៉ានីញ៉ូមដែលចម្រាញ់ខ្ពស់ដល់កម្រិតខ្ពស់គ្រប់គ្រាន់ ដើម្បីបង្កើតគ្រាប់បែកចំនួន ៦គ្រាប់បាន។ «ពួកគេនឹងប្រើវា។ ប្រទេសអ៊ីរ៉ង់ គឺជិតឈានការផលិតបានគ្រាប់បែកនុយក្លេអ៊ែរចំនួន ៦គ្រាប់ហ៊យ។ ពួកគេនឹងសម្លាប់អ៊ីស្រាអែល។ ពួកគេនឹងបន្តតាមយើង»។

លោកមិនបានបង្ហាញភ័ស្តុតាង ដើម្បីបញ្ជាក់ការអះអាងរបស់ខ្លួនទេ ហើយក៏មិនបានលាតត្រដាងប្រភពដែរ។

ទន្ទឹមនឹងនេះ មេបញ្ជាការនៃទីបញ្ជាកណ្តាលអាមេរិក (CENTCOM) លោក Michael Kurilla បាននិយាយ កាលពីថ្ងៃទី ០៧ ខែមីនាថា ទីក្រុងតេអេរ៉ង់ មិនបានធ្វើការសម្រេចចិត្ត ក្នុងការផលិតអាវុធនុយក្លេអ៊ែរនោះទេ។ ប្រធានាធិបតីអ៊ីរ៉ង់លោក Masoud Pezeshkian បានប្រាប់សារព័ត៌មាន NBC News កាលពីពាក់កណ្តាលខែមករាថា ទីក្រុងតេអេរ៉ង់ មិនកំពុងស្វែងរកគោលដៅ ដើម្បីទទួលបានគ្រាប់បែកបរមាណូនោះទេ។

កាលពីថ្ងៃទី ០៧ ខែមីនា ឆ្នាំ ២០២៥ ប្រធានាធិបតីអាមេរិក លោក ដូណាល់ ត្រាំ (Donald Trump) បាននិយាយថា លោកបានផ្ញើសារទៅកាន់មេដឹកនាំកំពូលរបស់អ៊ីរ៉ង់ Ayatollah Ali Khamenei ដោយស្នើឲ្យមានការពិភាក្សាអំពីកម្មវិធីនុយក្លេអ៊ែរ។ កាលពីថ្ងៃចន្ទ ទី០៧ ខែមេសានេះ គេបានដឹងថា ភាគីទាំងពីរ បានយល់ព្រមធ្វើការចរចាជុំដំបូង ក្នុងប្រទេសអូម៉ង់ នៅថ្ងៃទី ១២ ខែមេសា ខាងមុខនេះ។