នៅថ្ងៃពុធនេះ នាយករដ្ឋមន្រ្តីអេស្ប៉ាញលោក Pedro Sanchez ចុះចតនៅទីក្រុងហាណូយ ជាការចាប់ផ្តើមដំណើរទស្សនកិច្ចរយៈពេល ៣ថ្ងៃរបស់លោកទៅកាន់ប្រទេសវៀតណាម និងប្រទេសចិន ។

លោកស្ថិតក្នុងចំណោមក្រុមមេដឹកនាំអឺរ៉ុបជាច្រើនទៀតដែលធ្វើដំណើរទៅកាន់តំបន់បូព៌ា បន្ទាប់ពីការប្រកាសរបស់ប្រធានាធិបតីសហរដ្ឋអាមេរិកលោក Donald Trump ពីការដំឡើងពន្ធពាណិជ្ជកម្មសកល ។

ជុំថ្មីនៃពន្ធបដិការដ៏ធ្ងន់ធ្ងរដែលដាក់ដោយលោក Trump បានចូលជាធរមានហើយ សម្រាប់ផលិតផលនាំចូលពីប្រទេសជាច្រើនជុំវិញពិភពលោក។ ជុំនៃពន្ធបដិការ មានកម្រិតលើសពីអត្រាមូលដ្ឋាន ១០% ដែលត្រូវបានដាក់លើប្រទេសជាច្រើនផ្សេងទៀត កាលពីចុងសប្តាហ៍ ។ 

ចំណែកឯប្រទេសចិនកំពុងទទួលរងកម្រិតពន្ធថ្មី ៨៤ភាគរយ ដែលជាផ្នែកមួយនៃអត្រាពន្ធសរុប ១០៤ភាគរយ លើការនាំចេញទំនិញរបស់ខ្លួនទៅកាន់សហរដ្ឋអាមេរិក ។

នាយករដ្ឋមន្រ្តីវៀតណាមលោក Pham Minh Chinh និយាយថា លោក Sanchez ដែលដឹកនាំរដ្ឋាភិបាលនិយមឆ្វេងរបស់អឺរ៉ុបនោះ នឹងចំណាយពេល ២ថ្ងៃនៅក្នុងប្រទេសវៀតណាម ជាទីដែលលោកព្យាយាមធ្វើឲ្យទំនាក់ទំនងជាមួយអេស្ប៉ាញ ឡើងដល់កម្រិតភាពជាដៃគូយុទ្ធសាស្រ្តគ្រប់ជ្រុងជ្រោយ នៅដំណាក់កាលដំបូងបង្អស់ ។ 

មេដឹកនាំទាំង ២ បានសន្យាពង្រឹងទំនាក់ទំនងសេដ្ឋកិច្ច និងកិច្ចសហប្រតិបត្តិការការពារជាតិ និងបង្ហាញការគាំទ្រសម្រាប់រក្សាពាណិជ្ជកម្មសេរី ។ លោក Sanchez និយាយថា អេស្ប៉ាញសូមប្រឆាំងចំពោះជម្លោះពាណិជ្ជកម្ម ៕