សារព័ត៌មាន The Independent បានរាយការណ៍កាលពីថ្ងៃអង្គារថា ក្រុមតាលីបង់ បានបដិសេធពាក្យចចាមអារ៉ាមដែលថា មូលដ្ឋានទ័ពអាកាស Bagram របស់ប្រទេសអាហ្វហ្គានីស្ថាន ត្រូវបានប្រគល់ឲ្យសហរដ្ឋអាមេរិកវិញនោះ។

ការបដិសេធនេះ បានធ្វើឡើង បន្ទាប់ពីជើងហោះហើររបស់យន្តហោះដឹកទំនិញយោធាអាមេរិក ចូលក្នុងប្រទេសអាហ្វហ្គានីស្ថាន កាលពីចុងសប្តាហ៍។

ប្រព័ន្ធផ្សព្វផ្សាយក្នុងស្រុកបានរាយការណ៍ថា យន្តហោះ C-17 បានហោះចេញពីមូលដ្ឋានទ័ពអាកាស Al-Udeid ក្នុងប្រទេសកាតា ហើយបានទៅដល់ប្រទេសអាហ្វហ្គានីស្ថាន តាមរយៈប្រទេសប៉ាគីស្ថាន ដោយបានចុះចតនៅមូលដ្ឋានទ័ពអាកាស Bagram កាលពីថ្ងៃអាទិត្យ។

កាសែត Khaama Press បានរាយការណ៍ថា ជើងហោះហើរនេះ បានដឹកមន្ត្រីចារកម្មជាន់ខ្ពស់របស់សហរដ្ឋអាមេរិក ក្នុងនោះមានលោក Michael Ellis ដែលជាអនុប្រធាន CIA ផងដែរ។

សារព័ត៌មាននេះ បានបន្ថែមថា ក្រុមតាលីបង់បានប្រគល់មូលដ្ឋាននេះ ទៅឲ្យសហរដ្ឋអាមេរិក បន្ទាប់ពីមានការអត្ថាធិប្បាយរបស់លោកប្រធានាធិបតី ដូណាល់ ត្រាំ ( Donald Trump) ដែលបង្ហាញពីចំណាប់អារម្មណ៍លើមូលដ្ឋានទ័ពអាកាសនេះ ដែលមានទីតាំងនៅភាគខាងជើងនៃទីក្រុងកាប៊ុល។

ទោះបីជាយ៉ាងណាក៏ដោយ ប្រធានអ្នកនាំពាក្យរបស់ក្រុមតាលីបង់ លោក Zabiullah Mujahid បានច្រានចោលរបាយការណ៍នេះថា ជា «ការឃោសនា» ហើយបាននិយាយថា រដ្ឋាភិបាលរក្សាការគ្រប់គ្រងទាំងស្រុងលើមូលដ្ឋាននេះ។

លោកបានបន្ថែមថា៖«ពុំចាំបាច់មានវត្តមានយោធារបស់ប្រទេសណាមួយ នៅក្នុងប្រទេសអាហ្វហ្គានីស្ថាននាពេលបច្ចុប្បន្ននេះទេ ហើយរដ្ឋឥស្លាមនេះ នឹងមិនអនុញ្ញាតឲ្យមានសកម្មភាពបែបនេះទេ» ដោយពណ៌នាអំពីការកាន់កាប់មូលដ្ឋាននេះដោយសហរដ្ឋអាមេរិកថា «មិនអាចទៅរួចទេ»។