អ្នកនាំពាក្យក្រសួងការបរទេសរុស្ស៊ីអ្នកស្រី Maria Zakharova និយាយនៅថ្ងៃពុធនេះថា ការទម្លាក់គ្រាប់បែកលើអ៊ីរ៉ង់នឹងមិនត្រួសត្រាយផ្លូវសម្រាប់សន្តិភាពនោះទេ ហើយទីក្រុងម៉ូស្គូសង្ឃឹមថា កិច្ចប្រជុំរវាងសហរដ្ឋអាមេរិក និងអ៊ីរ៉ង់ នឹងអាចបញ្ចៀសវិបត្តិមួយនេះ ។

ឆ្លើយសំនួរពីទីភ្នាក់ងារព័ត៌មានរ៉យទ័រ អ្នកស្រី Zakharova និយាយថា ពិភពលោកហត់នឿយកាន់តែខ្លាំងចំពោះការគំរាមកំហែងគ្មានទីបញ្ចប់ប្រឆាំងអ៊ីរ៉ង់ ហើយរុស្ស៊ីគាំទ្រយុទ្ធសាស្រ្តសមហេតុផលចំពោះជម្លោះ ជុំវិញកម្មវិធីនុយក្លេអ៊ែររបស់ទីក្រុងតេអេរ៉ង់ ។

គួរឲ្យដឹងថា អ៊ីរ៉ង់ និងសហរដ្ឋអាមេរិក នឹងចូលរួមកិច្ចប្រជុំនៅប្រទេសអូម៉ង់នៅថ្ងៃទី ១២ ខែមេសាខាងមុខនេះ ស្របពេលដែលភាពតានតឹងជុំវិញមហិច្ឆិតានុយក្លេអ៊ែររបស់អ៊ីរ៉ង់ កើនឡើងខ្ពស់ ។ អ៊ីរ៉ង់បានច្រានចោលការចរចាដោយផ្ទាល់ និងព្រមទទួលយកការសម្រុះសម្រួលរបស់អូម៉ង់ ។

លោក Gholam-Reza Sadeghian គឺជានិពន្ធនាយកកាសែត Javan និយាយថា អ៊ីរ៉ង់ អាចនឹងកាត់បន្ថយកម្រិតនៃការចម្រាញ់សារធាតុអ៊ុយរ៉ានីញ៉ូម សម្រាប់ការដកចេញទាំងស្រុងនូវទណ្ឌកម្មរបស់សហរដ្ឋអាមេរិក ។

ដោយឡែក អ្នកនាំពាក្យក្រសួងការបរទេសសហរដ្ឋអាមេរិក អ្នកស្រី Tammy Bruce បាននិយាយទម្លាក់សារៈសំខាន់នៃកិច្ចប្រជុំនេះ ដោយបញ្ជាក់ថា ជំនួបនៅប្រទេសអូម៉ង់ គួរតែត្រូវបានចាត់ទុកថា ជាកិច្ចប្រជុំ មិនមែនកិច្ចចរចានោះទេ ៕