អង្គការសម្បុរសធម៌សង្រ្គោះកុមារដែលមានមូលដ្ឋាននៅចក្រភពអង់គ្លេស និយាយនៅថ្ងៃពុធនេះថា មនុស្ស ៨នាក់ រកគ្រោះដោយសារជំងឺអាសន្នរោគនៅស៊ូដង់ខាងត្បូង រួមទាំងក្មេងៗ ៥នាក់ដែរនោះ បានស្លាប់នៅតាមផ្លូវ ពេលដើរអស់រយៈពេល ៣ម៉ោង ដើម្បីស្វែងរកការព្យាបាលវេជ្ជសាស្រ្ត បន្ទាប់ពីការកាត់ផ្តាច់ជំនួយរបស់ទីភ្នាក់ងារ USAID បង្ខំឲ្យសេវាកម្មសុខភាពក្នុងស្រុកបិទទ្វារ ។

ករណីស្លាប់មនុស្សកាលពីខែមុន ស្ថិតនៅក្នុងចំណោមករណីស្លាប់លើកដំបូង រួមចំណែកដោយផ្ទាល់ដោយសារការកាត់ផ្តាច់ជំនួយដោយប្រធានាធិបតីសហរដ្ឋអាមេរិកលោក Donald Trump ក្រោយរូបលោកឡើងកាន់អំណាចកាលពីថ្ងៃទី ២០ ខែមករាកន្លងទៅ ។ រដ្ឋបាលសហរដ្ឋអាមេរិក និយាយថា ពួកគេបានបង្កកជំនួយបណ្តោះអាសន្ន ដើម្បីពិនិត្យមើលឡើងវិញថាតើការផ្តល់ជំនួយទាំងនេះ មានបានស្របតាមរបៀបវារៈ “អាមេរិកជាធំ”របស់លោក Trumpដែរឬទេ ។

ក្រុមអ្នកជំនាញ ព្រមានថា ការកាត់ផ្តាច់ជំនួយមនុស្សធម៌នេះ រួមទាំងការលុបចោលកិច្ចសន្យាជាង ៩០ភាគរយរបស់ទីភ្នាក់ងារ USAID នឹងបណ្តាលឲ្យបាត់បង់ជីវិតមនុស្សរាប់លាននាក់នៅក្នុងរយៈពេលប៉ុន្មានឆ្នាំខាងមុខ ដោយសារកង្វះអាហារូបត្ថម្ភ ជំងឺអេដស៍ ជំងឺរបេង ជំងឺគ្រុនចាញ់ និងជំងឺផ្សេងៗជាច្រើនទៀត ។

ក្រសួងការបរទេសសហរដ្ឋអាមេរិក ពុំបានឆ្លើយតបភ្លាមៗនោះទេចំពោះសំណើសុំសេចក្តីអត្ថាធិប្បាយ ។

អង្គការសង្រ្គោះកុមារនិយាយនៅក្នុងសេចក្តីថ្លែងការណ៍ថា ពួកគេបានគាំទ្រមណ្ឌលសុខភាព ២៧កន្លែង នៅរដ្ឋ Jonglei ស្ថិតនៅភាគខាងកើតស៊ូដង់ខាងត្បូង រហូតដល់ដើមឆ្នាំនេះ ពេលដែលការកាត់ផ្តាច់ជំនួយសហរដ្ឋអាមេរិក បង្ខំឲ្យពួកគេបិទទាំងស្រុងមណ្ឌលសុខភាព ៧កន្លែង និងមណ្ឌលសុខភាព ២០កន្លែងផ្សេងទៀត បិទដោយអន្លើរ ។

ពួកគេបន្តថា សេវាកម្មដឹកជញ្ជូនផ្តល់ហិរញ្ញវត្ថុដោយសហរដ្ឋអាមេរិក ដើម្បីនាំអ្នកជំងឺទៅកាន់មន្ទីរពេទ្យនៅទីក្រុងធំ បានឈប់ដំណើរការ ដោយសារកង្វះខាតមូលនិធិ បង្ខំឲ្យអ្នកជំងឺ ៨នាក់ដើរក្រោមអាកាសធាតុក្តៅខ្លាំងមានសីតុណ្ហភាពរហូតដល់ ៤០អង្សសេ ដើម្បីស្វែងរកការព្យាបាលនៅមន្ទីរពេទ្យជិតបង្កើយបំផុត ។

លោក Christopher Nyamandi គឺជាប្រធានអង្គការសង្រ្គោះកុមារនៅស៊ូដង់ខាងត្បូង និយាយថា ក្មេង ៣នាក់ ក្នុងចំណោមក្មេងដែលបានស្លាប់ មានអាយុក្រោម ៥ឆ្នាំ ៕