អ្នកនាំពាក្យក្រសួងការបរទេសចិនកាលពីថ្ងៃពុធសប្ដាហ៍នេះ បានអំពាវនាវឱ្យសហរដ្ឋអាមេរិកងាកទៅរកការចរចារពន្ធដោយអាកប្បកិរិយាសមភាព ការគោរព និងផលប្រយោជន៍ទៅវិញទៅមក។

ក្រសួងហិរញ្ញវត្ថុរបស់ចិន កាលពីថ្ងៃពុធ ៩ មេសា បានប្រកាសដំឡើងពន្ធ ៨៤ភាគរយ លើទំនិញរបស់អាមេរិក ចាប់ពីថ្ងៃព្រហស្បតិ៍ ១០ មេសាសប្ដាហ៍នេះ ដោយដំឡើងពីកម្រិត ៣៤ភាគរយដែលបានប្រកាសថ្មីៗនេះ ជាការបន្ថែមកម្ដៅដល់សង្គ្រាមពាណិជ្ជកម្មពិភពលោកដែលបង្កឡើងដោយប្រធានាធិបតីអាមេរិក Donald Trump។លោកប្រធានាធិបតី Donald Trump កាលពីថ្ងៃពុធបានប្រកាសផ្អាកការដំឡើងពន្ធរយៈពេល ៩០ ថ្ងៃសម្រាប់ប្រទេសដែលជាប់ពន្ធខ្ពស់របស់សហរដ្ឋអាមេរិក ប៉ុន្តែលោកបានដំឡើងពន្ធលើទំនិញពីប្រទេសចិនដល់ទៅ១២៥%។

លោក Lin Jian បានកត់សម្គាល់បែបនេះ ជាការឆ្លើយតបទៅនឹងការដំឡើងពន្ធបន្ថែមរបស់ទីក្រុងវ៉ាស៊ីនតោន លើទំនិញចិនចូលក្នុងសហរដ្ឋអាមេរិក។

ដោយកត់សម្គាល់ថា សហរដ្ឋអាមេរិកបន្តដំឡើងពន្ធលើសកម្រិតលើប្រទេសចិន ហើយប្រើវិធីដាក់សម្ពាធអតិបរិមាមកលើចិន លោក Li បាននិយាយថា ប្រទេសចិនប្រឆាំងយ៉ាងម៉ឺងម៉ាត់ ហើយនឹងមិនទទួលយកទង្វើគំរាមកំហែង និងអនុត្តរភាពបែបនេះឡើយ។

លោកបាននិយាយថា ប្រសិនបើសហរដ្ឋអាមេរិកពិតជាចង់ដោះស្រាយបញ្ហាតាមរយៈការសន្ទនា និងការចរចានោះ ត្រូវតែប្រកាន់យកអាកប្បកិរិយាសមភាព ការគោរព និងផលប្រយោជន៍ទៅវិញទៅមក។

លោក Lin បាននិយាយថា ទោះយ៉ាងណាក៏ដោយ ប្រសិនបើសហរដ្ឋអាមេរិកសម្រេចចិត្តមិនខ្វល់ពីផលប្រយោជន៍របស់សហរដ្ឋអាមេរិកខ្លួនឯង ប្រទេសចិន និងពិភពលោកផ្សេងទៀត ហើយប្តេជ្ញា ប្រយុទ្ធប្រឆាំងសង្គ្រាមពន្ធ និងពាណិជ្ជកម្ម ការឆ្លើយតបរបស់ប្រទេសចិននឹងបន្តរហូតដល់ទីបញ្ចប់៕