ក្រុមនិវត្តន៍ជន និងសមាជិកសហជីពរាប់ពាន់នាក់ ប្រមូលផ្តុំគ្នាយ៉ាងច្រើនកុះករនៅទីក្រុង ប៊ុយណូស៊ែរ កាលពីថ្ងៃពុធ (០៩ មេសា) ដើម្បីតវ៉ាចំពោះវិធានការរឹតបន្តឹងផ្នែកសេដ្ឋកិច្ចរបស់លោកប្រធានាធិបតី ហាវីយេ មីឡៃ (Javier Milei) ដែលពួកគេអះអាងថា បានជះឥទ្ធិពលអាក្រក់ខ្លាំងដល់ជីវភាពរស់នៅរបស់ប្រជាជន។

បាតុកម្ម ដែលគាំទ្រដោយសហជីពធំបំផុតរបស់អាហ្សង់ទីននេះ បានធ្វើឡើងជាផ្នែកនៃកូដកម្មរយៈពេល ២៤ម៉ោង ដែលប៉ះពាល់ដល់វិស័យផ្សេងៗ។ និវត្តន៍ជនជាច្រើន បានសម្តែងការខកចិត្តរបស់ពួកគេចំពោះការបាត់បង់លទ្ធភាពទិញ និងឱសថសំខាន់ៗ បន្ទាប់ពីលោក Milei បានកាត់បន្ថយការឧបត្ថម្ភធនសម្រាប់ការដឹកជញ្ជូន ប្រេងឥន្ធនៈ និងថាមពល ព្រមទាំងបណ្តេញមន្ត្រីរដ្ឋរាប់ម៉ឺននាក់ និងបិទក្រសួងរដ្ឋាភិបាលជាច្រើន។

វិធានការនេះបានកាត់បន្ថយអតិផរណាពីតមែន ហើយធ្វើឱ្យមានអតិរេកថវិកាលើកដំបូងរបស់អាហ្សង់ទីនក្នុងពេលជាងមួយទសវត្សរ៍ ប៉ុន្តែក៏បានធ្វើឱ្យប្រទេសនេះធ្លាក់ក្នុងវិបត្តិសេដ្ឋកិច្ច និងមនុស្សរាប់លាននាក់ទៀតធ្លាក់ទៅក្នុងភាពក្រីក្រ នៅខែដំបូងនៃរដ្ឋាភិបាលរបស់លោក Milei ទោះបីជាទិន្នន័យផ្លូវការបង្ហាញពីតួលេខកំណើនសេដ្ឋកិច្ចដែលប្រសើរឡើងក៏ដោយ។

មន្រ្តីអាហ្សង់ទីននិយាយថា គោលនយោបាយសារពើពន្ធរបស់លោក Milei បានកំណត់គោលដៅមិនសមាមាត្រលើនិវត្តន៍ជន ដោយកាត់បន្ថយប្រាក់ចំណូល និងអត្ថប្រយោជន៍របស់ពួកគេ។ ទោះបីជាលោក Milei ជោគជ័យក្នុងការកាត់បន្ថយអតិផរណាក៏ដោយ ប៉ុន្តែអ្នករិះគន់អះអាងថា វិធីសាស្រ្តរបស់លោកបានធ្វើឱ្យមានវិសមភាពសង្គម និងការលំបាកកាន់តែខ្លាំងឡើង៕