ប្រធានាធិបតីប្រេស៊ីល លោក Luiz Inacio Lula da Silva កាលពីថ្ងៃពុធ (០៩ មេសា) បានរិះគន់យ៉ាងចាស់ដៃលើពន្ធនាំចូលរបស់សហរដ្ឋអាមេរិក ថាជារឿង "បំពាន" នៅក្នុងកិច្ចប្រជុំកំពូលនៃបណ្ដាមេដឹកនាំអាមេរិកឡាទីន ដែលបានជំរុញឱ្យមានរណសិរ្សរួបរួមប្រឆាំងនឹងវិធានការសេដ្ឋកិច្ចរបស់លោក Donald Trump ទោះបីជាមានការផ្អាកពន្ធបណ្ដោះអាសន្នជាច្រើនក៏ដោយ។

លោក Lula ស្ថិតក្នុងចំណោមប្រមុខរដ្ឋចំនួន១១រូប ដែលប្រមូលផ្តុំគ្នាក្នុងប្រទេសហុងឌុយរ៉ាស សម្រាប់កិច្ចប្រជុំនៃសហគមន៍រដ្ឋអាមេរិកឡាទីន និងការ៉ាអ៊ីប (CELAC) ដែលមានសមាជិក ៣៣ប្រទេស ហើយក្នុងនោះក៏មានចិនផងដែរ ដែលកំពុងស្វះស្វែងរកអ្នកជំនួសសហរដ្ឋអាមេរិក ដែលជាឥទ្ធិពលនយោបាយ និងសេដ្ឋកិច្ចដ៏សំខាន់នៅក្នុងតំបន់។

លោក Lula ប្រធាននាំមុខនៃសេដ្ឋកិច្ចធំបំផុតរបស់អាមេរិកឡាទីន បាននិយាយថា "ការយកពន្ធតាមអំពើចិត្តធ្វើឱ្យសេដ្ឋកិច្ចអន្តរជាតិមានអស្ថិរភាព និងឡើងថ្លៃទំនិញ។ ប្រវត្តិសាស្រ្តបង្រៀនពិភពលោកថាសង្រ្គាមពាណិជ្ជកម្មមិនមានអ្នកឈ្នះនោះទេ"។ ជាមួយគ្នានេះ មេដឹកនាំអាមេរិកឡាទីនផ្សេងទៀតក៏បានជំរុញឱ្យរួបរួមប្រឆាំងនឹងគោលនយោបាយពន្ធរបស់អាមេរិក។

នៅថ្ងៃទី០៥ ខែមេសា ដៃគូពាណិជ្ជកម្មរបស់អាមេរិក បានរងពន្ធ "មូលដ្ឋាន" ១០% ដែលនៅតែជាធរមាន បើទោះបីជាលោក Trump បានផ្អាកកាលពីថ្ងៃពុធ (០៩ មេសា) លើពន្ធធំៗមួយចំនួនក៏ដោយ។ ពន្ធរបស់លោក Trump - ដែលមួយចំនួនបានផ្អាក និងផ្លាស់ប្តូរជាច្រើនដងនោះ - បានគំរាមកំហែងដល់ការរំខានសេដ្ឋកិច្ចយ៉ាងខ្លាំងក្លាសម្រាប់តំបន់អាមេរិកឡាទីន និងសមុទ្រការ៉ាអ៊ីប៕