រដ្ឋបាលរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ បានដាក់ចេញទណ្ឌកម្មថ្មី ទៅលើប្រទេសអ៊ីរ៉ង់ នៅមុនពេលកិច្ចចរចាដែលបានគ្រោងទុក រវាងប្រទេសទាំងពីរ ជុំវិញកម្មវិធីនុយក្លេអ៊ែររបស់អ៊ីរ៉ង់។ ក្រសួងរតនាគារ បាននិយាយកាលពីថ្ងៃពុធថា ក្រសួងបានដាក់ទណ្ឌកម្មលើអង្គភាពចំនួន៥និងបុគ្គលម្នាក់មានមូលដ្ឋាននៅប្រទេសអ៊ីរ៉ង់។

រដ្ឋមន្ត្រីក្រសួងរតនាគារលោក Scott Bessent បាននិយាយថា រតនាគារនឹងបន្តប្រើប្រាស់ឧបករណ៍ និងអាជ្ញាធររបស់ខ្លួន ដើម្បីបង្អាក់រាល់ការប៉ុនប៉ងណាមួយរបស់អ៊ីរ៉ង់ ក្នុងការជំរុញកម្មវិធីនុយក្លេអ៊ែរ និងរបៀបធ្វើឱ្យមានអស្ថិរភាពកាន់តែទូលំទូលាយ។ ក្នុងឆ្នាំ២០១៨ ក្នុងអំឡុងពេលអាណត្តិដំបូងរបស់លោក Trump លោកបានដកសហរដ្ឋអាមេរិកជាឯកតោភាគីចេញពីកិច្ចព្រមព្រៀងនុយក្លេអ៊ែរឆ្នាំ២០១៥ រវាងអ៊ីរ៉ង់ និងក្រុមប្រទេសមហាអំណាចមួយក្រុម ដែលក្នុងនោះអ៊ីរ៉ង់បានព្រមព្រៀងដាក់កម្រិតកម្មវិធីនុយក្លេអ៊ែររបស់ខ្លួនជាថ្នូរនឹងការបញ្ចប់ការដាក់ទណ្ឌកម្ម។

ចាប់តាំងពីពេលនោះមក អ៊ីរ៉ង់ បានពន្លឿនការអភិវឌ្ឍនុយក្លេអ៊ែររបស់ខ្លួនជាការឆ្លើយតបទៅនឹងការបន្តដាក់ទណ្ឌកម្មរបស់អាមេរិក។

ជាមួយគ្នានេះ ប្រធានាធិបតីសហរដ្ឋអាមេរិក លោក Donald Trump បានបង្កើនសម្ពាធលើប្រទេសអ៊ីរ៉ង់ដោយការគំរាមកំហែងប្រើកម្លាំងយោធា មុនពេលកិច្ចពិភាក្សារវាងប្រទេសទាំងពីរជុំវិញកម្មវិធីនុយក្លេអ៊ែររបស់ទីក្រុងតេអេរ៉ង់។ រដ្ឋមន្ត្រីការបរទេសអ៊ីរ៉ង់ លោក Abbas Araghchi និងបេសកជនពិសេសសហរដ្ឋអាមេរិកប្រចាំតំបន់មជ្ឈិមបូព៌ា លោក Steve Witkoff ត្រូវបានគេរំពឹងថានឹងជួបប្រជុំគ្នានៅប្រទេសអូម៉ង់ នៅថ្ងៃសៅរ៍។